Rain Alert | రాష్ర్టానికి ‘మోచా’ ముప్పు.. మరో రెండు రోజులు వానలు

రాష్ట్రానికి ‘మోచా’ తుఫాన్‌ ముప్పు పొంచి ఉన్నదని హైదరాబాద్‌ వాతావరణ కేంద్రం తెలిపింది. ఈ నెల 7న ఆగ్నేయ బంగాళాఖాతంలో అల్పపీడనం చోటుచేసుకోనున్నదని, 8న అది వాయుగుండంగా మారే అవకాశం ఉన్నదని.. ద్రోణి, ఉపరితల ఆవర్తనంతోపాటు ‘మోచా’ తుఫాన్‌ ఏర్పడే అవకాశమున్నదని అంచనా వేస్తున్నది.

• హైదరాబాద్‌ వాతావరణ కేంద్రం

Rain Alert | హైదరాబాద్‌, మే 5 (నమస్తే తెలంగాణ): రాష్ట్రానికి ‘మోచా’ తుఫాన్‌ ముప్పు పొంచి ఉన్నదని హైదరాబాద్‌ వాతావరణ కేంద్రం తెలిపింది. ఈ నెల 7న ఆగ్నేయ బంగాళాఖాతంలో అల్పపీడనం చోటుచేసుకోనున్నదని, 8న అది వాయుగుండంగా మారే అవకాశం ఉన్నదని.. ద్రోణి, ఉపరితల ఆవర్తనంతోపాటు ‘మోచా’ తుఫాన్‌ ఏర్పడే అవకాశమున్నదని అంచనా వేస్తున్నది.

మోచా కారణంగా తెలంగాణతోపాటు ఆంధ్రప్రదేశ్‌, ఒడిశా రాష్ర్టాల్లో భారీ వర్షాలు కురుస్తాయని తెలిపింది. హైదరాబాద్‌లో సాయంత్రం లేదా రాత్రి వేళల్లో జల్లులు పడతాయని వెల్లడించింది. శుక్రవారం పలు జిల్లాల్లో ఉరుములు, మెరుపులు, ఈదురుగాలులతో కూడిన ఓ మోస్తరు వర్షాలు కురిసాయి. ఈ నెల 6, 7 తేదీల్లో రాష్ట్రంలోని పలు ప్రాంతాల్లో 30 నుంచి 40 కిలోమీటర్ల వేగంతో ఈదురు గాలులతో కూడిన వర్షం కురిసే అవకాశమున్నదని తెలిపింది.

కాగా, శుక్రవారం ఆదిలాబాద్‌లో రాష్ట్రంలోనే అత్యధికంగా 34.5 డిగ్రీలు, జీహెచ్‌ఎంసీ పరిధిలోని హయత్‌నగర్‌లో అత్యల్పంగా 19.6 డిగ్రీల ఉష్ణోగ్రత నమోదైంది. రాష్ట్రంలోని చాలా ప్రాంతాల్లో 30 డిగ్రీల లోపు గరిష్ఠ, 20 డిగ్రీలపైన కనిష్ఠ ఉష్ణోగ్రతలు నమోదైనట్టు వివరించింది. పగటి పూట కాస్త ఎండ ప్రభావం, సాయంత్రం, రాత్రి వేళల్లో వర్షం కురుస్తుందని వాతావరణ శాఖ వెల్లడించింది.