రుణ మోసం కేసు దర్యాప్తు అధికారం ఈడీకి ఉన్నది: హైకోర్టు

బ్యాంకు రుణాన్ని వన్‌టైమ్‌ సెటిల్మెంట్‌ (ఓటీఎస్‌) కింద చెల్లించేందుకు దరఖాస్తు చేసుకున్నంత మాత్రాన ఈడీ జారీచేసిన సమన్లను రద్దు చేయలేమని హైకోర్టు స్పష్టం చేసింది.

హైదరాబాద్‌, అక్టోబర్‌ 19 (నమస్తే తెలంగాణ): బ్యాంకు రుణాన్ని వన్‌టైమ్‌ సెటిల్మెంట్‌ (ఓటీఎస్‌) కింద చెల్లించేందుకు దరఖాస్తు చేసుకున్నంత మాత్రాన ఈడీ జారీచేసిన సమన్లను రద్దు చేయలేమని హైకోర్టు స్పష్టం చేసింది. నిందితులను విచారించే అధికారం ఈడీకి ఉన్నదని పేరొన్నది. బ్యాంకును రూ.4.82 కోట్లకు మోసగించారన్న ఆరోపణలతో 2021లో సీబీఐ నమోదు చేసిన కేసు ఆధారంగా ఈ ఏడాది ఆగస్టులో ఈడీ తమకు సమన్లు జారీచేయడాన్ని సవాలు చేస్తూ పరుచూరి కుమార్‌ అలియాస్‌ కనుగంటి సురేశ్‌ కుమార్‌, మరొకరు హైకోర్టులో పిటిషన్‌ దాఖలు చేయడంతో జస్టిస్‌ శ్రీనివాసరావు ఈ తీర్పు వెలువరించారు.