దర్శకుడు రాఘవేంద్రరావుకు హైకోర్టు నోటీసులు

హైదరాబాద్‌, బంజారాహిల్స్‌ సమీపంలోని షేక్‌పేట్‌లో అత్యంత విలువైన రెండెకరాల భూకేటాయింపుల్లో నిబంధనలు ఉల్లంఘించారన్న ఆరోపణపై సినీ దర్శకుడు కే రాఘవేంద్రరావు, మరికొందరికి హైకోర్టు నోటీసులు జారీచేసింది.

• భూ దుర్వినియోగంపై ప్రజాప్రయోజన వ్యాజ్యం

హైదరాబాద్‌, నవంబర్‌ 9, (నమస్తే తెలంగాణ): హైదరాబాద్‌, బంజారాహిల్స్‌ సమీపంలోని షేక్‌పేట్‌లో అత్యంత విలువైన రెండెకరాల భూకేటాయింపుల్లో నిబంధనలు ఉల్లంఘించారన్న ఆరోపణపై సినీ దర్శకుడు కే రాఘవేంద్రరావు, మరికొందరికి హైకోర్టు నోటీసులు జారీచేసింది. బంజారాహిల్స్‌ సర్వే నం.403/1లోని రెండెకరాల భూ కేటాయింపును రద్దు చేయాలంటూ మెదక్‌కు చెందిన బాలకిషన్‌ 2012లో దాఖలు చేసిన ప్రజాహిత వ్యాజ్యం గురువారం హైకోర్టులో మరోసారి విచారణకు వచ్చింది.

గత ఏడాది రాఘవేంద్రరావు, ఆయన బంధువులు కే కృష్ణమోహన్‌రావు, కేఎస్‌ చక్రవర్తి, కే విజయలక్ష్మి, కే అఖిలాండేశ్వరి, కే లాలసదేవికి నోటీసులు జారీ అయ్యాయి. వాటిని అందుకున్నట్టుగా రికార్డుల్లో లేకపోవడంతో వారికి మళ్లీ హైకోర్టు నోటీసులు జారీ చేసింది.

హైదరాబాద్‌కు సినీ పరిశ్రమను తరలించాలని 1984లో అప్పటి ప్రభుత్వం రెండెకరాలను రాయితీ ధరకు ఇస్తే దానిలో నిబంధనలకు విరుద్ధంగా రాఘవేంద్రరావు, ఆయన బంధువులు పబ్స్‌, బార్స్‌, థియేటర్స్‌ నిర్మించారని పిటిషనర్‌ ఫిర్యాదు చేశారు. దీనిపై అధికారుల నుంచి స్పందన లేకపోవడంతో హైకోర్టులో పిల్‌ దాఖలు చేశారు. దీనిపై ధర్మాసనం గురువారం విచారణ జరిపింది. తదుపరి విచారణను వచ్చే ఏడాది జనవరి 18కి వాయిదా వేసింది.