జలాశయాలు నింపి రైతులకు నీరివ్వండి

సిద్దిపేట జిల్లాలోని అన్నపూర్ణ(అనంతగిరి) రిజర్వాయర్‌, రంగనాయక సాగర్‌, మల్లన్నసాగర్‌, కొండపోచమ్మ సాగర్‌ జలాశయాల్లోని కాళేశ్వరం గోదావరి జలాలు పంపింగ్‌ చేయాలని రాష్ట్ర నీటిపారుదల శాఖ మంత్రి ఉత్తమ్‌కుమార్‌రెడ్డికి మాజీ మంత్రి, సిద్దిపేట ఎమ్మెల్యే హరీశ్‌రావు లేఖ రాశారు.

• రాజకీయాలు పక్కనపెట్టి నీటిని పంపింగ్‌చేయండి
• మంత్రి ఉత్తమ్‌కు హరీశ్‌రావు లేఖ

హైదరాబాద్‌, ఆగస్టు 3 (నమస్తే తెలంగాణ) / సిద్దిపేటప్రతినిధి: సిద్దిపేట జిల్లాలోని అన్నపూర్ణ(అనంతగిరి) రిజర్వాయర్‌, రంగనాయక సాగర్‌, మల్లన్నసాగర్‌, కొండపోచమ్మ సాగర్‌ జలాశయాల్లోని కాళేశ్వరం గోదావరి జలాలు పంపింగ్‌ చేయాలని రాష్ట్ర నీటిపారుదల శాఖ మంత్రి ఉత్తమ్‌కుమార్‌రెడ్డికి మాజీ మంత్రి, సిద్దిపేట ఎమ్మెల్యే హరీశ్‌రావు లేఖ రాశారు. ప్రస్తుతం ఈ రిజర్వాయర్లు డెడ్‌స్టోరేజీకి చేరినట్టు తెలిపారు.

గతేడాది ఇదే ఆగస్టు నెలలో అనంతగిరి రిజర్వాయర్‌లో 3.32 టీఎంసీలు నీళ్లు ఉంటే, ప్రస్తుతం 0.75 టీఎంసీలు, రంగనాయకసాగర్‌లో 2.38 టీఎంసీలకు ప్రస్తుతం 0.67 టీఎంసీలు, మల్లన్నసాగర్‌ 18 టీఎంసీలకు ప్రస్తుతం 8.5 టీఎంసీలు, కొండపోచమ్మ సాగర్‌లో 10 టీఎంసీలకు ప్రస్తుతం 4.5 టీఎంసీల నీళ్లు మాత్రమే ఉన్నట్టు లేఖలో పేర్కొన్నారు. ఒకవైపు రిజర్వాయర్లలో నీళ్లు లేక, మరోవైపు వర్షాలు కురవక రైతులు తీవ్ర ఆందోళనలో ఉన్నారని, పంటలు వేయాలా? వద్దా?అనే అయోమయంతో ఆవేదన చెందుతున్నారని పేర్కొన్నారు.

గతేడాదితో పోలిస్తే జిల్లాలో పంటల సాగు విస్తీర్ణం తగ్గిపోయిందని చెప్పారు. రాజకీయాలు పక్కనపెట్టి మిడ్‌ మానేరు అన్నపూర్ణ రిజర్వాయర్‌, రంగనాయక సాగర్‌, మల్లన్నసాగర్‌, కొండపోచమ్మ సాగర్‌లకు నీటిని పంపింగ్‌ చేసేలా ఇరిగేషన్‌ అధికారులకు వెంటనే ఆదేశాలు జారీ చేయాలని కోరారు. రిజర్వాయర్లు నింపి కాలువల ద్వారా నీటిని విడుదల చేసి ఆయకట్టుకు నీళ్లందించేలా చర్యలు తీసుకోవాలని రైతుల పక్షాన మంత్రిని హరీశ్‌రావు లేఖలో కోరారు.