సార్‌ సీఎం అయితేనే బాధలు తీరుతాయి

తెలంగాణ సాధకుడు.. ప్రగతి ప్రదాత.. బీఆర్‌ఎస్‌ అధినేత కేసీఆర్‌ మరోసారి రాష్ట్రానికి సారథ్యం వహించాలనే ఆకాంక్ష రోజురోజుకూ బలపడుతున్నది. ఆయన ముఖ్యమంత్రి అయితేనే అభివృద్ధి పట్టాలెక్కుతుందని, సంక్షేమం పరుగులు పెడుతుందనే భావన సబ్బండజనుల్లో వ్యక్తమవుతున్నది.

• హత్నూర నుంచి కార్యకర్తల పాదయాత్ర .. కాలినడకన ఎర్రవల్లిలోని నివాసానికి చేరిక.. కేసీఆర్‌ను కలిసి ఆకాంక్ష వ్యక్తంచేసిన వైనం

హైదరాబాద్‌, నవంబర్‌ 9 (నమస్తే తెలంగాణ) : తెలంగాణ సాధకుడు.. ప్రగతి ప్రదాత.. బీఆర్‌ఎస్‌ అధినేత కేసీఆర్‌ మరోసారి రాష్ట్రానికి సారథ్యం వహించాలనే ఆకాంక్ష రోజురోజుకూ బలపడుతున్నది. ఆయన ముఖ్యమంత్రి అయితేనే అభివృద్ధి పట్టాలెక్కుతుందని, సంక్షేమం పరుగులు పెడుతుందనే భావన సబ్బండజనుల్లో వ్యక్తమవుతున్నది. పండుగలు, వేడుకల్లో ఆటాపాటల రూపంలో ప్రతిబింబిస్తున్నది. సార్‌ తిరిగొస్తేనే సాగు బాగుపడుతుందని, రైతుల సమస్యలు తీరుతాయని తెలంగాణ జనం ముక్తకంఠంతో చెబుతున్నారు. ఇటీవల తెలంగాణ నలుమూలల నుంచి అనేకమంది యువకులు పాదయాత్రగా వచ్చి కేసీఆర్‌ను కలిసి ఆశీర్వాదం తీసుకుంటుండటంపై సర్వత్రా ఆసక్తి నెలకొన్నది.

మహబూబ్‌నగర్‌ జిల్లా దేవరకద్ర మండలం గూరకొండకు చెందిన చిన్న నర్సింహ, మహబూబ్‌నగర్‌ జిల్లా కోయిలకొండ మండలం అంకెల్ల గ్రామానికి చెందిన కావలి రాంచందర్‌, పెద్దపల్లి జిల్లా మంథనికి చెందిన టెన్నీపాల్‌, బూర్ల వెంకటేశ్‌, కొండా వెంకటేశ్‌, కుమ్రం భీం ఆసిఫాబాద్‌ జిల్లా వాంకిడికి చెందిన జాడే తిరుపతి, దుర్గం శంకర్‌, సంగారెడ్డి జిల్లా హత్నూర మండలం మాధుర గ్రామానికి చెందిన ఉదయ్‌కిరణ్‌, నర్సింలు, సిరిసిల్ల జిల్లాకు చెందిన కంచెర్ల రవిగౌడ్‌… కేసీఆర్‌ తిరిగి సీఎం కావాలని కాలినడకన ఎర్రవల్లికి చేరుకొని కేసీఆర్‌ను కలిశారు. దారి పొడవునా ఎదురైన అనుభవాలు, ప్రజలు వ్యక్తంచేస్తున్న ఆకాంక్షను ఆయనకు వివరించారు.

ఇదే కోవలో నర్సాపూర్‌ నియోజకవర్గం హత్నూర మండలానికి చెందిన మధుర గ్రామ సర్పంచ్‌ నవీన్‌గౌడ్‌, ఉదయ్‌కిరణ్‌, రాజీవ్‌గాంధీ, నర్సింహ, శ్రీకాంత్‌, ప్రవీణ్‌కుమార్‌ పాదయాత్రగా వచ్చి ఆదివారం ఎర్రవల్లిలో కేసీఆర్‌ను కలిశారు. ‘మీరు ముఖ్యమంత్రి అయితేనే రాష్ట్రం బాగుపడుతుంది.. రైతన్నల సమస్యలు తీరుతాయి’ అని వివరించారు. ఈ సందర్భంగా వారికి కేసీఆర్‌ భరోసా ఇచ్చారు. త్వరలోనే మంచి రోజులు వస్తాయని వెన్నుతట్టారు. కాలినడకన తనను కలిసేందుకు వచ్చిన వారిని అభినందించారు. కేసీఆర్‌ను కలిసిన కార్యకర్తలు ఆనందంతో ఉప్పొంగిపోయారు. మహానేతను కలవడం ఎంతో ఆనందంగా ఉన్నదని హర్షం వ్యక్తంచేశారు. తెలంగాణ ప్రజలందరూ కేసీఆర్‌ను మరోసారి ముఖ్యమంత్రిగా చూడాలనుకుంటున్నారని స్పష్టంచేశారు.