TGPSC | గ్రూప్-3 అభ్య‌ర్థుల‌కు కీల‌క అప్డేట్.. అరగంట ముందే గేట్లు బంద్‌

నవంబర్‌లో జరిగే గ్రూప్‌-3 పరీక్షల నిర్వహణపై టీజీపీఎస్సీ కసరత్తు తీవ్రతరం చేసింది. 17, 18తేదీల్లో మూడు సెషన్లలో జరిగే పరీక్షలకు ఆలస్యంగా వచ్చే వారిని అనుమతించమని, అరగంట ముందుగానే గేట్లు మూసేస్తామని కమిషన్‌ ప్రకటించింది.

• నవంబర్‌ 17, 18న గ్రూప్‌-3 పరీక్షలు
• అభ్యర్థులకు పలు సూచనలు చేసిన టీజీపీఎస్సీ
• మహిళా అభ్యర్థులు మంగళ సూత్రం, గాజులు తప్ప మరే ఆభరణాలు వేసుకెళ్లొద్దు

హైదరాబాద్‌, అక్టోబర్‌ 11 (నమస్తే తెలంగాణ): నవంబర్‌లో జరిగే గ్రూప్‌-3 పరీక్షల నిర్వహణపై టీజీపీఎస్సీ కసరత్తు తీవ్రతరం చేసింది. 17, 18తేదీల్లో మూడు సెషన్లలో జరిగే పరీక్షలకు ఆలస్యంగా వచ్చే వారిని అనుమతించమని, అరగంట ముందుగానే గేట్లు మూసేస్తామని కమిషన్‌ ప్రకటించింది. మొదటి సెషన్‌కు ఉదయం 9:30 గంటలకు, రెండో సెషన్‌కు మధ్యాహ్నం 2:30కు గేట్లు క్లోజ్‌ చేస్తామని టీజీపీఎస్సీ కార్యదర్శి నవీన్‌ నికోలస్‌ తెలిపారు. ఓఎమ్మార్‌ పద్ధతిలో నిర్వహించనున్న పరీక్షలపై కమిషన్‌ ముఖ్య సూచనలు చేసింది.

కమిషన్‌ సూచనలిలా..

• మొదటి సెషన్‌కు ఉదయం 8:30 నుంచి, రెండో సెషన్‌కు మధ్యాహ్నం 1: 30 నుంచి అభ్యర్థులను పరీక్షాకేంద్రాల్లోకి అనుమతిస్తారు.
• అభ్యర్థులకు తెలుగు, ఇంగ్లిష్‌, లేదా ఇంగ్లిష్‌, ఉర్దూ భాషల్లో ప్రశ్నపత్రాలిస్తారు. దరఖాస్తు సమయంలో ఎంపికచేసుకున్న ప్రకారం ప్రశ్నపత్రాలిస్తారు.
• నవంబర్‌ 17న ఉదయం సెషన్‌కు తీసుకెళ్లిన హాల్‌టికెట్‌నే మిగతా రెండు సెషన్లకు తీసుకెళ్లాలి.
• మహిళా అభ్యర్థులు మంగళసూత్రం, గాజులు తప్ప మరేలాంటి ఆభరణాలు ధరించరాదు.
• పరీక్షాకేంద్రంలో ఇతరులతో మాట్లాడినా.. వస్తువులను మార్చుకున్నా, నినాదాలు చేసినా, పరీక్షకు అంతరాయం సృష్టించినా ఆయా అభ్యర్థిని డిస్‌క్వాలిఫై చేస్తారు. ఒకరికి బదులు మరొకరు పరీక్ష రాస్తే క్రిమినల్‌ కేసులు పెడతారు.