Road Accident | సూర్యాపేట, ఖమ్మంలో వేర్వేరు ప్రమాదాల్లో నలుగురు మృతి

సూర్యాపేట, ఖమ్మం జిల్లాల్లో జరిగిన వేర్వేరు ప్రమాదాల్లో (Road Accident) నలుగురు మృతి చెందారు. సూర్యాపేట (Suryapet) జిల్లా మునగాల మండలం ఆకుపాముల వద్ద ట్రాక్టర్‌ను ఓ లారీ ఢీకొట్టింది.

హైదరాబాద్‌: సూర్యాపేట, ఖమ్మం జిల్లాల్లో జరిగిన వేర్వేరు ప్రమాదాల్లో (Road Accident) నలుగురు మృతి చెందారు. సూర్యాపేట (Suryapet) జిల్లా మునగాల మండలం ఆకుపాముల వద్ద ట్రాక్టర్‌ను ఓ లారీ ఢీకొట్టింది. ఈ ప్రమాదంలో ఇద్దరు మరణించగా, మరో ఇద్దరు తీవ్రంగా గాయపడ్డారు. ఆకుపాముల వద్ద జాతీయ రహదారిపై కొందరు కూలీలు మొక్కలు కట్‌ చేస్తున్నారు. ఈ క్రమంలో వేగంగా వచ్చిన లారీ అదుపుతప్పి ట్రాక్టర్‌ను ఢీకొట్టి వారిపైకి దూసుకెళ్లింది. దీంతో ఇద్దరు కూలీలు అక్కడికక్కడే మృతిచెందారు.

మరో ఘటనలో ఖమ్మంలో (Khammam) ఓ బైకు అదుపుతప్పి డివైడర్‌ను ఢీకొట్టింది. దీంతో మోటారుసైకిల్‌పై వెళ్తున్న ఇద్దరు యువకులు చనిపోగా, మరొకరు గాయపడ్డారు. సమాచారం అందుకున్న పోలీసులు ఘటనా స్థలానికి చేరుకుని సహాయకచర్యలు చేపట్టారు. మృతులను మేడిపల్లికి చెందిన శివరామకృష్ణ, ఉదయ్‌కుమార్‌గా గుర్తించారు. క్షతగాత్రుడిని దవాఖానకు తరలించారు. ఈ ప్రమాద ఘటనలపై కేసు నమోదుచేసిన పోలీసులు దర్యాప్తు చేస్తున్నారు.