కోస్గిలో ఇండ్ల కూల్చివేత కోసం మార్కింగ్‌

కోస్గిలో మళ్లా కూల్చివేతల అలజడి మొదలైంది. ఇండ్ల కూల్చివేత కోసం అధికారులు మార్కింగ్‌ వేస్తూ రెండ్రోజుల్లో ఖాళీ చేయాలంటూ హుకుం జారీ చేయడంతో నారాయణపేట జిల్లాలోని కోస్గి పట్టణంలోని 11, 12, 13 వార్డుల ప్రజలు ఆందోళన చెందుతున్నారు.

• రెండ్రోజుల్లో ఖాళీ చేయాలి..
• కౌన్సిలర్లను చుట్టుముట్టిన ప్రజలు
• సమాచారం లేకుండా కూలిస్తే ధర్నా చేస్తామని హెచ్చరిక

కోస్గి, నవంబర్‌ 13 : కోస్గిలో మళ్లా కూల్చివేతల అలజడి మొదలైంది. ఇండ్ల కూల్చివేత కోసం అధికారులు మార్కింగ్‌ వేస్తూ రెండ్రోజుల్లో ఖాళీ చేయాలంటూ హుకుం జారీ చేయడంతో నారాయణపేట జిల్లాలోని కోస్గి పట్టణంలోని 11, 12, 13 వార్డుల ప్రజలు ఆందోళన చెందుతున్నారు. ఇండ్లు మావి.. కష్టం మాది.. మా ఇండ్లను కూల్చడానికి మీరెవరు.. అంటూ అధికారులపై ఆగ్రహం వ్యక్తంచేశారు. గతంలో 25 ఫీట్ల రోడ్డు పేరుతో పరిహారం ఇవ్వకుండానే మున్సిపల్‌ సిబ్బంది కూల్చివేతలు కొనసాగించారు. ప్రస్తుతం రోడ్డుకు ఇరువైపులా 33 ఫీట్ల మేర కూల్చి వేతల కోసం మార్కింగ్‌ వేశారు.

సంబంధిత వార్డుల ప్రజలు మున్సిపల్‌ కార్యాలయానికి చేరుకోగా కమిషనర్‌ లేకపోవడంతో వార్డుల సంబంధించిన కౌన్సిలర్లను పిలిచారు. వారు రాగానే ప్రజలు భారీగా చుట్టుముట్టారు. మాట మరచిన అధికారులను వార్డుల్లో తిరగనివ్వమని తెగేసి చెప్పారు. మా వార్డుల్లో రోడ్లు అవసరం లేదు.. ఉన్న రోడ్డు చాలన్నారు. 35 ఫీట్ల రోడ్డు వేయడం ఎందకని ప్రశ్నించగా.. కౌన్సిలర్లు నీళ్లు నమిలారు. మా నిర్మాణాలు కూల్చడానికి కమిషనర్‌ ఎవరని ప్రశ్నించారు. పరిహారం చెల్లించాకే.. అది కూడా 25 ఫీట్ల మేర మాత్రమే పనులు చేపట్టాలన్నారు. శనివారం కమిషనర్‌తో మాట్లాడుదామని చెప్పడంతో వారంతా అక్కడి నుంచి వెనుదిరిగారు.