MLC Jeevan Reddy | పోచారం కాంగ్రెస్‌లో చేరడం అవకాశవాద రాజకీయం.. ఇతరులను చేర్చుకోవాల్సిన అవసరం లేదు: ఎమ్మెల్సీ జీవన్‌రెడ్డి

మాజీ స్పీకర్‌, బీఆర్‌ఎస్‌ ఎమ్మెల్యే పోచారం శ్రీనివాసరెడ్డి కాంగ్రెస్‌ పార్టీలో చేరడం అవకాశవాద రాజకీయమని కాంగ్రెస్‌ నేత, ఎమ్మెల్సీ టీ జీవన్‌రెడ్డి అన్నారు.

MLC Jeevan Reddy | జగిత్యాల, జూన్‌ 22 : మాజీ స్పీకర్‌, బీఆర్‌ఎస్‌ ఎమ్మెల్యే పోచారం శ్రీనివాసరెడ్డి కాంగ్రెస్‌ పార్టీలో చేరడం అవకాశవాద రాజకీయమని కాంగ్రెస్‌ నేత, ఎమ్మెల్సీ టీ జీవన్‌రెడ్డి అన్నారు. రాష్ట్రంలో 65 మంది ఎమ్మెల్యేలతో కాంగ్రెస్‌ ప్రభుత్వం సుస్థిరంగా ఉన్నదని, ఇతర పార్టీల నాయకులను చేర్చుకోవాల్సిన అవసరం ఉందని తాను భావించడం లేదని తెలిపారు. ఇలాంటి వాటిని తాను వ్యక్తిగతంగా ప్రోత్సహించనని స్పష్టంచేశారు.

శనివారం జగిత్యాల జిల్లా కేంద్రంలోని ఇందిరా భవన్‌లో విప్‌ అడ్లూరి లక్ష్మణ్‌తో కలిసి ఆయన మీడియాతో మాట్లాడారు. ఓ విలేకరి అడిగిన ప్రశ్నకు పైవిధంగా స్పందించారు. ఏ రాజకీయ పార్టీ అయినా సిద్ధాంతాలకు అనుగుణంగా పనిచేయాల్సి ఉంటుందని అన్నారు. సీఎం రేవంత్‌ రెడ్డి అన్ని వర్గాల సంక్షేమం కోసం పథకాలు అమలు చేస్తున్నారని, ఎన్నికల్లో ఇచ్చిన హామీలు అమలు చేయడమే కాకుండా ప్రజా అవసరాలు దృష్టిలో ఉంచుకొని పథకాలు అమలు చేస్తున్నట్టు తెలిపారు.