ధాన్యం కొనుగోళ్లపై కేంద్రంతో తేల్చుకుంటం.. రేపు ఢిల్లీకి వెళ్తున్నం : సీఎం కేసీఆర్‌

CM KCR Press Meet | యాసంగిలో ధాన్యం కొనుగోలుతో కేంద్రంతో తేల్చుకుంటామని సీఎం కేసీఆర్‌ ప్రకటించారు. శనివారం సాయంత్రం ఆయన తెలంగాణ భవన్‌లో

హైదరాబాద్‌ : యాసంగిలో ధాన్యం కొనుగోలు విషయంలో కేంద్రంతో తేల్చుకుంటామని సీఎం కేసీఆర్‌ ప్రకటించారు. శనివారం సాయంత్రం ఆయన తెలంగాణ భవన్‌లో మీడియా మాట్లాడారు. ధాన్యం కొనుగోళ్లపై కేంద్రం వైఖరిని ఎండగట్టారు. తెలంగాణ రాష్ట్రానికి సంబంధించిన వరిధాన్యం కొనుగోలు మీద జరుగుతున్న వ్యవహారంలో ఎన్నిసార్లు నిరంతరంగా డిమాండ్‌ చేసినా కేంద్రం నుంచి ఉలుకూ లేదు పలూకు లేదు. ఎటువంటి సమాధానం కూడా వస్తలేదు. అన్ని రాష్ట్రాల నుంచి ధాన్యం సేకరించినట్లే తెలంగాణ నుంచి సేకరిస్తరు కాబట్టి.. సంవత్సరం టార్గెట్‌ ఇవ్వండి.. దాన్ని బట్టి రాష్ట్రంలో సర్దుబాటు చేయాల్సి ఉంటుందని అక్కరుంటది. అందువల్ల చేయమని రెక్వెస్ట్‌ చేసినం. ఎందుకోమరి సరైన పద్ధతుల్లో రావడం లేదు. మొన్న ధర్నా చేసిన రోజున రాష్ట్ర ప్రభుత్వంతో చర్చలు జరుపుతాం. మాట్లాడుతం అన్నరు. చివరి ప్రయత్నంగా రేపు ఢిల్లీకి వెళ్తున్నం.

మంత్రుల డెలిగేషన్‌, పార్లమెంట్‌ సభ్యులు డెలిగేషన్‌, ప్రభుత్వ ప్రధాన కార్యదర్శి ఆధ్వర్యంలో ఫైనాన్స్‌ సెక్రెటరీ, అగ్రికల్చర్‌ సెక్రెటరీ, సివిల్‌ సప్లయ్‌ సెక్రెటరీ అధికారులు డెలిగేషన్‌ కలిసి మంత్రిని, అధికారులను అవసరమైన పక్షంలో ప్రధానిని కలిసి డిమాండ్‌ చేద్దాం అనుకుంటున్నం. ఎందుకంటే అనురాధ కార్తి నిన్న ప్రారంభమైంది. రైతులు ఏదో ఒకటి తేల్చకపోతే రైతులు కన్ఫ్యూజన్‌లో పడ్తరు. అనవసరమైన ఇబ్బందులు చాలా వచ్చే అవకాశం ఉంటది. రైతులు తమకు ముందే చెబితే వేరే పంట వేసుకుందుం కదా.. యాళ్లకు నష్టపోయినం అనే మాట వస్తది. మొన్న గాలివార్త వచ్చింది.. రాష్ట్ర ప్రభుత్వంతో ధాన్యం కొనుగోలు మీద మాట్లాడుతామని, బాయిల్డ్‌ రైస్‌ కొనమని చెప్పినట్లు వార్త వచ్చింది. మరి అధికారికమా? కాదా? అడిగి తేల్చుకునేందుకు ఢిల్లీకి వెళ్తున్నం. బహుశా రెండు రోజులు పట్టొచ్చు. దాని దరిమిలా తెలంగాణ రైతాంగానికి ఏందనేది విషయాన్ని తెలుపుతామని సీఎం కేసీఆర్‌ అన్నారు.