క్రీస్తు బోధనలు ఆచరణీయం: సీఎం కేసీఆర్‌

క్రిస్మస్‌ పర్వదినాన్ని పురస్కరించుకొని ముఖ్యమంత్రి కే చంద్రశేఖర్‌రావు రాష్ట్ర, దేశ ప్రజలకు శుభాకాంక్షలు తెలిపారు.

• దేశ ప్రజలకు సీఎం కేసీఆర్‌ క్రిస్మస్‌ శుభాకాంక్షలు

హైదరాబాద్‌, డిసెంబర్‌ 24 (నమస్తే తెలంగాణ): క్రిస్మస్‌ పర్వదినాన్ని పురస్కరించుకొని ముఖ్యమంత్రి కే చంద్రశేఖర్‌రావు రాష్ట్ర, దేశ ప్రజలకు శుభాకాంక్షలు తెలిపారు. శాంతి, కరుణ, సహనం, ప్రేమ విలువలను ప్రపంచానికి చాటిన ఏసుక్రీస్తు బోధనలు విశ్వమానవ సహోదరత్వానికి దోహదం చేశాయని ఆయన శనివారం ఒక ప్రకటనలో పేర్కొన్నారు. ఒకవైపు శాస్త్ర, సాంకేతిక రంగాలు గొప్పగా పురోగమిస్తున్నా.. మరోవైపు మానవీయ విలువలు మృగ్యమైపోతున్న నేటికాలంలో క్రీస్తు బోధనలు ఆచరణీయమని అన్నారు. శత్రువునైనా క్షమించే గొప్ప గుణం, సాటి మనుషుల పట్ల ప్రేమ, కరుణ, సహనం అనే సద్గుణాల ఆచరణ అనివార్యమైనదని పేర్కొన్నారు. ఏసుక్రీస్తు దీవెనలు ప్రజలందరికీ లభించాలని సీఎం కేసీఆర్‌ ఆకాంక్షించారు.