Medicines | లైసెన్స్‌ చూసి మందులు కొనండి.. ప్రజలకు డీసీఏ డీజీ కమలాసన్‌రెడ్డి సూచన

ప్రజలు ఔషధాలు కొనుగోలు చేసే ముందు కచ్చితంగా ఆ దుకాణానికి లైసెన్స్‌ ఉన్నదో లేదో పరిశీలించాలని డ్రగ్స్‌ కంట్రోల్‌ అడ్మినిస్ట్రేషన్‌ డీజీ కమలాసన్‌ రెడ్డి సూచించారు.

• హైదరాబాద్‌ సంతోష్‌నగర్‌లో మెడికల్‌ షాప్‌ సీజ్‌
• అనుమతి లేని 111 రకాల మందుల విక్రయం

Medicines | హైదరాబాద్‌, జనవరి 26 (నమస్తే తెలంగాణ): ప్రజలు ఔషధాలు కొనుగోలు చేసే ముందు కచ్చితంగా ఆ దుకాణానికి లైసెన్స్‌ ఉన్నదో లేదో పరిశీలించాలని డ్రగ్స్‌ కంట్రోల్‌ అడ్మినిస్ట్రేషన్‌ డీజీ కమలాసన్‌ రెడ్డి సూచించారు. అనుమతులు లేని దుకాణాల్లో నకిలీ మందులు అమ్మేందుకు ఎక్కువ అవకాశాలు ఉన్నాయని చెప్పారు. హైదరాబాద్‌లోని ఐఎస్‌ సదన్‌, సంతోష్‌నగర్‌లో లైసెన్స్‌ లేకుండా నిర్వహిస్తున్న ఓ మెడికల్‌ షాప్‌లో గురువారం తనిఖీలు చేసినట్టు తెలిపారు. ఎలాంటి అనుమతులు లేకుండానే మొత్తం 111 రకాల మందులు విక్రయిస్తున్నట్టు గుర్తించామని వెల్లడించారు. ఇందులో తరుచుగా వాడే మందులతోపాటు యాంటీ బయాటిక్స్‌, ఇన్సులిన్‌, యాంటీ వైరల్‌, పెయిన్‌ కిల్లర్స్‌ వంటివి కూడా ఉన్నట్టు తెలిపారు. వీటి విలువ రూ.3.20 లక్షలు అని వివరించారు.

షాప్‌ నిర్వాహకుడు మహ్మద్‌ ఇల్తేఫా అహ్మద్‌పై కేసు నమోదు చేసినట్టు తెలిపారు. లైసెన్స్‌ లేని దుకాణాల్లో తప్పుడు మందులు ఇచ్చే అవకాశం ఉన్నదని, ఇవి వ్యాధిని తగ్గించకపోగా కొత్త సైడ్‌ ఎఫెక్ట్స్‌ తెచ్చే ప్రమాదం ఉన్నదని పేర్కొన్నారు. మెడికల్‌ షాపుల్లో కచ్చితంగా అందరికీ కనిపించే చోట లైసెన్స్‌ను ప్రదర్శించాల్సి ఉంటుందని సూచించారు. మెడికల్‌ షాప్‌పై అనుమానం ఉంటే https://odls.telangana.gov. in/ThirdPartypublicview.aspx వెబ్‌సైట్‌ లింక్‌ను ఓపెన్‌ చేసి.. అందులో వచ్చే విండోలో మెడికల్‌ షాప్‌ పేరును ఎంటర్‌ చేస్తే వివరాలు వస్తాయని చెప్పారు. సందేహాలు తలెత్తితే టోల్‌ ఫ్రీ నంబర్‌ 1800 599 6969 నంబర్‌కు సమాచారమివ్వాలని కోరారు.