Etamatam | ‘నెల్లూరు పెద్దారెడ్డి ఎవరో తెలియదా? అసలు మీలాంటి వారికి ఉద్యోగాలు ఇచ్చినవాడిని తప్పుపట్టాలి’ అంటూ సాగే ‘అనగనగా ఒకరోజు’ సినిమాలోని బ్రహ్మానందం డైలాగ్ మనం వినే ఉంటాం. నెల్లూరు పెద్దారెడ్డి సంగతి అటుంచితే, ఆ షర్మిల ఎవరో తనకు తెలియదని ఎంఐఎం అధినేత అసదుద్దీన్ ఓవైసీ చేసిన తాజా వ్యాఖ్యలు చర్చనీయాంశంగా మారాయి. రాజన్న రాజ్యం పార్టీ అధ్యక్షురాలు వైఎస్ షర్మిల కాంగ్రెస్కు మద్దతు ప్రకటించడం పట్ల స్పందించాల్సిందిగా ఓవైసీని మీడియా కోరగా, అసలు షర్మిల ఎవరు? అని ప్రశ్నించారు.
వైఎస్ రాజశేఖర్రెడ్డి కూతురు షర్మిల తెలియదా? అని ప్రశ్నిస్తే, వైఎస్ బిడ్డ అయితే ఏంటీ? అని ఎదురు ప్రశ్నించారు. అందరికీ తెలియడానికి ఆమె ఏమైనా తోపా అని ఓవైసీ మరింత రెచ్చిపోయారు. స్థిరత్వం లేకుండా షర్మిల మాదిరిగా పూటకో మాట మాట్లాడేవారిని ఏ రంగంలోనైనా ఏవిధంగా చులకనగా చూస్తారో అందుకు ఓవైసీ వ్యాఖ్యలే నిదర్శనం. కాగా వైఎస్ కుటుంబాన్ని కాంగ్రెస్ ఎన్ని ఇబ్బందులు పెట్టిందో తెలిసి కూడా షర్మిల ఆ పార్టీకి మద్దతు ప్రకటించడాన్ని ఆమె విజ్ఞతకే వదిలేస్తున్నట్టు ప్రకటించి వైఎస్ఆర్సీపీ కూడా చాలా లైట్ తీసుకున్న విషయం తెలిసిందే.
– వెల్జాల