హమాస్‌ సొరంగాల్లోకి కృత్రిమ వరద!

గాజాలోని హమాస్‌ సొరంగాల్లో కృత్రిమ వరదల్ని సృష్టించేందుకు ఇజ్రాయెల్‌ సైనిక బలగాలు సిద్ధమవుతున్నాయి.

• హమాస్‌ దళాల్ని బయటకు రప్పించేందుకు ఇజ్రాయెల్‌ వ్యూహం

జెరూసలేం, డిసెంబర్‌ 5: గాజాలోని హమాస్‌ సొరంగాల్లో కృత్రిమ వరదల్ని సృష్టించేందుకు ఇజ్రాయెల్‌ సైనిక బలగాలు సిద్ధమవుతున్నాయి. సొరంగాల్లో నక్కిన హమాస్‌ దళాల్ని బయటకు రప్పించేందుకు ఇజ్రాయెల్‌ ఈ వ్యూహాన్ని ఎంచుకున్నట్టు ‘వాల్‌స్ట్రీట్‌ జర్నల్‌’ వార్తా కథనం వెల్లడించింది. ఈ కథనం ప్రకారం, వ్యూహం అమలుపై నవంబర్‌లో ఇజ్రాయెల్‌ అధికారికంగా అమెరికాతో సమాచారం పంచుకుందట. అల్‌ షాతీ శరణార్థి శిబిరానికి ఉత్తరాన ఐదు భారీ మోటార్‌ పంపుల్ని ఇజ్రాయెల్‌ ఆర్మీ సిద్ధం చేసిందని తెలిసింది. గాజాలోని పెద్ద పెద్ద సొరంగాలు ఇజ్రాయెల్‌ సైన్యానికి కొరకరాని కొయ్యగా మారాయి. అందులో బందీలతో సహా దాక్కున్న హమాస్‌ దళాలు ఇజ్రాయెల్‌పై బాంబు దాడులు, మిలటరీ ఆపరేషన్స్‌, రాకెట్‌ దాడులు నిర్వహిస్తున్నాయి. దీంతో ఈ సొరంగాలన్నింటినీ నీటితో నింపేయాలనే పథకాన్ని ఇజ్రాయెల్‌ ఎంచుకుంది. దీనికి సంబంధించి పనులు మొదలయ్యాయని, ఇది అమలుజేస్తే గాజాలో నీటి సరఫరా అంతా దెబ్బతింటుందని ‘వాల్‌స్ట్రీట్‌ జర్నల్‌’ కథనం తెలిపింది.