హైదరాబాద్, డిసెంబర్ 30 (నమస్తే తెలంగాణ): వైద్యారోగ్య శాఖలో 950 అసిస్టెంట్ సివిల్ సర్జన్ పోస్టుల నియామకాలు పూర్తయ్యాయి. ఇందులో డైరెక్టరేట్ ఆఫ్ పబ్లిక్ హెల్త్ అండ్ ఫ్యామిలీ వెల్ఫేర్ (డీపీహెచ్& ఎఫ్డబ్ల్యూ) పరిధిలో 734 పోస్టులు, తెలంగాణ వైద్యవిధాన పరిషత్ (టీవీవీపీ) పరిధిలో 209 పోస్టులు, ఐపీఎం పరిధిలో 7 పోస్టులు ఉన్నాయి. వీటికి ఎంపికైన అభ్యర్థులకు శుక్రవారం కౌన్సెలింగ్ పూర్తవడంతో శనివారం హైదరాబాద్లో నిర్వహించనున్న ప్రత్యేక కార్యక్రమంలో రాష్ట్ర వైద్యారోగ్య శాఖ మంత్రి టీ హరీశ్రావు నియామక పత్రాలను అందజేయనున్నారు.
రాష్ట్రంలో 90 వేలకుపైగా ఉద్యోగాలను భర్తీ చేస్తామని సీఎం కేసీఆర్ గతంలో ప్రకటించిన విషయం తెలిసిందే. అందులో భాగంగా తెలంగాణ మెడికల్ హెల్త్ సర్వీసెస్ రిక్రూట్మెంట్ బోర్డు కేవలం 6 నెలల్లోనే ఈ నియామకాలను పూర్తిచేయడం గమనార్హం. డీపీహెచ్ & హెచ్డబ్ల్యూ, టీవీవీపీ, ఐపీఎం పరిధిలో 969 పోస్టుల భర్తీకి బోర్డు ఈ ఏడాది జూన్ 15న నోటిఫికేషన్ విడుదల చేసింది. ఇందులో డీపీహెచ్ అండ్ హెచ్డబ్ల్యూ పరిధిలో 751, టీవీవీపీ పరిధిలో 211, ఐపీఎం పరిధిలో 7 పోస్టులు ఉన్నాయి. మల్టీజోన్ పోస్టులైన వీటికి రాష్ట్రవ్యాప్తంగా మొత్తం 4,803 దరఖాస్తులు వచ్చాయి.
అంటే ఒక్కో పోస్టుకు దాదాపు ఐదుగురు అభ్యర్థులు పోటీ పడ్డారు. రాత పరీక్ష లేకుండా, నేరుగా మెరిట్ ఆధారంగా ఎంపిక ప్రక్రియ జరిగింది. వచ్చిన దరఖాస్తులను అధికారులు పరిశీలించి గత నెల 9వ తేదీన ప్రాథమిక మెరిట్ లిస్ట్ను విడుదల చేశారు. అనంతరం అభ్యంతరాలను పరిశీలించి గత నెల 20న రెండో మెరిట్ లిస్ట్ను విడుదల చేశారు. ఒక్కో పోస్టుకు ఇద్దరు చొప్పున అభ్యర్థులను ఎంపికచేసి గత నెల 22 నుంచి 29 వరకు హైదరాబాద్లో సర్టిఫికెట్ల వెరిఫికేషన్ నిర్వహించారు. చివరగా 950 పోస్టులకు అభ్యర్థులను ఎంపికచేసి ఈ నెల 19న ఫలితాలను విడుదల చేశారు. ఈ ప్రక్రియ మొత్తం అత్యంత పారదర్శకంగా సాగింది.