నిద్ర‌లో క‌ల‌లు వ‌స్తే మంచిదేనా? ఈ విష‌యం తెలిస్తే షాక‌వుతారు?

September 24, 2021 / 06:05 PM IST

Dreams | ‘అసలు మనిషికి నిద్ర అవసరమా? ఆ ఎనిమిది గంటలు కూడా అందుబాటులో ఉంటే ఎంత పని చేసుకోవచ్చో!’ అనే ఆలోచన ప్రతి ఒక్కరికీ ఏదో ఓ దశలో వచ్చి తీరుతుంది. నిద్ర వల్ల శరీరానికి విశ్రాంతి దక్కే మాట వాస్తవమే కానీ… అంతకు మించిన ఉపయోగం ఏదైనా ఉందా అన్నదీ తెలుసుకోవాలనుకున్నారు జపాన్‌ పరిశోధకులు. ఇందుకోసం ఎలుకల మెదడులోకి రంగుల రసాయనాలను ఎక్కించారు. అలా, వాటి మెదడులో రక్తప్రసరణ తీరును కనుగొనే ప్రయత్నం చేశారు. ఫలితాలు ఆశ్చర్యకరం!

మన మెలకువకూ… ఆదమరచి నిద్రలోకి జారుకునే స్థితికీ మధ్య Rapid Eye Movement (REM) అనే దశ ఒకటి ఉంటుంది. మనం కలలు కనేది కూడా ఆ సమయంలోనే. REM దశలో మెదడులోని రక్తనాళాలు చాలా చురుగ్గా ఉండటాన్ని గమనించారు. తద్వారా, అవి మెదడుకు కావాల్సిన పోషకాలను తీసుకుని, అవసరంలేని వ్యర్థాలను వదిలించుకోవడం గమనించారు. మెదడు ఆరోగ్యంగా, శుభ్రంగా ఉండటానికి నిద్ర చాలా ఉపయోగపడుతుందని ఈ పరిశోధనతో తేలిపోయింది. ఈ అధ్యయనం అల్జీమర్స్‌ లాంటి సమస్యలకు కూడా పరిష్కారాన్ని చూపుతుందని భావిస్తున్నారు. ఆలస్యం ఎందుకు? మీ జీవనశైలిలో నిద్రకు సమయం ఇవ్వండి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి