ఈ పాప మాములుది కాదండోయ్ .. 9 నెల‌ల‌కే కుంచెప‌ట్టి పెయింటింగ్‌లు.. నాలుగేండ్ల‌కే అవార్డులు..

November 20, 2021 / 04:51 PM IST

aelita andre |చిన్నపిల్లలకు చదవడం, రాయడం కంటే బొమ్మలేయడమే ఇష్టం. రంగులద్దడమంటే మహా సరదా. ముద్దు ముద్దుగా ‘మమ్మీ.. డాడీ..’ అని పలకడానికి ముందే కుంచె పట్టి బొమ్మలేయడం ప్రారంభించింది ఆస్ట్రేలియాకు చెందిన అలిటా ఆండ్రీ. తొమ్మిది నెలల వయసులో కుంచెపట్టిన ఈ పిల్ల పికాసో గురించి తెలుసుకుందామా..

అలిటా ఆండ్రీ.. 2020 సంవత్సరానికిగానూ ప్రపంచవ్యాప్తంగా వందమంది ఉత్తమ చిత్రకారుల జాబితాలో చోటు సంపాదించుకున్న చిన్నారి. పదమూడేండ్ల అలిటా పుట్టిన తొమ్మిది నెలలకే తండ్రి మైఖెల్‌తో కలిసి కాన్వాస్‌పై రంగులద్దేందుకు ప్రయత్నించేదట. అలిటా ఆసక్తిని గమనించిన తండ్రి ఆమె చేతికి కుంచె అందించాడు. అది మొదలు, వర్ణాలే తన ప్రపంచం అయ్యాయి. ఏడాదిన్నర వయసులోనే లండన్‌ ఆర్ట్‌ గ్యాలరీలో అలిటా మొదటి చిత్రాన్ని ప్రదర్శించారు.

నాలుగేండ్లకే ‘సప్త వర్ణాల బాల మేధావి’ పేరున తన చిత్రాలతో ప్రదర్శన నిర్వహించిందీ చిన్నారి. మూడు వారాలపాటు జరిగిన ఆ ప్రదర్శనలో అలిటా వేసిన 24 చిత్రాలు నాలుగు వేల నుంచి పది వేల డాలర్లు పలికాయి. విమర్శకులు సైతం ‘యంగ్‌ పికాసో’ అని పొగిడేలా చేశాయి. 2016లో ‘యంగెస్ట్‌ ఆర్టిస్ట్‌ ఇన్‌ ద వరల్డ్‌’ అవార్డుకు ఎంపికైన ఈ చిన్నారి చిత్రాలను ‘రష్యన్‌ అకాడమీ ఆఫ్‌ ఫైన్‌ ఆర్ట్స్‌’ మ్యూజియంలో ప్రదర్శించారు. ప్రకృతికి సంబంధించిన లోతైన భావాలను కాన్వాస్‌పై అద్దుతూ అందరి మన్ననలూ పొందుతున్న ఈ చిన్నారికి మనమూ ఆల్‌ ది బెస్ట్‌ చెప్పేద్దాం!