ఒత్తిడి తగ్గితే శిరోజాలకు శుభవార్తే!

మనిషికి జుట్టంటే మహాప్రేమ. ఆ నాలుగు వెంట్రుకలూ రాలిపోవడమో, తెల్లబడటమో జరిగితే చాలు న్యూనత మొదలవుతుంది. మన జుట్టు గురించి పాలవాడు, పొరుగువాడూ వినిపించే సానుభూతి వాక్యాలు ఆ బాధమీద ఉప్పూకారం చల్లుతాయి. ఇవన్నీ ఇప్పటిలో తీరే సమస్యలు కాకపోయినా, జుట్టుగురించి ఓ ఆశ్చర్యకరమైన పరిశోధన వెలుగుచూసింది. కేవలం ఒత్తిడివల్లే జుట్టు తెల్లబడితే మాత్రం ఆ రంగును మార్చవచ్చని చెబుతున్నారు పరిశోధకులు. ఇందుకోసం వాళ్లు కొంతమంది విద్యార్థులను ఎంచుకున్నారు. వారివారి ఒత్తిడి స్థాయిని రోజూ నమోదు చేయమని చెప్పారు. ఒత్తిడి ఎక్కువగా ఉన్నవారిలో జుట్టు తెల్లబడే అవకాశాలూ ఎక్కువగానే ఉన్నాయని, కొద్దిరోజులు వాళ్లు సెలవులో విశ్రాంతి తీసుకొన్నప్పుడు ఒత్తిడి తగ్గి జుట్టు మళ్లీ నల్లబడిందనీ ఆ శాస్త్రవేత్తలు గ్రహించారు. ఇది జుట్టు విషయంలో మాత్రమే శుభవార్త కాదు, శరీరంలో శాశ్వతం అనుకునే కొన్ని మార్పులను, మళ్లీ వెనక్కి మళ్లించే అవకాశం ఉందనడానికీ ఒక శుభ సూచన.