Visit:
లక్నో : సయ్యిద్‌ మోడీ ఇంటర్నేషనల్‌ సూపర్‌ 300 టోర్నీలో భారత మహిళల డబుల్స్‌ జోడీ త్రిసా జాలీ, గాయత్రి గోపీచంద్‌ టైటిల్‌ను నిలబెట్టుకున్నారు. డిఫెండింగ్‌ చాంపియన్‌గా ఈ టోర్నీ బరిలో నిలిచిన ఈ జోడీ.. ఆదివారం జరిగిన ఫైనల్స్‌లో 17-21, 21-13, 21-15తో కహొ ఒసావా, మై తనబె ద్వయాన్ని ఓడించింది. గంటా 16 నిమిషాల పాటు సాగిన ఈ పోరులో తొలి గేమ్‌ను కోల్పోయినప్పటికీ తర్వాత పుంజుకున్న భారత ద్వయం.. తర్వాత వరుసగా రెండు గేమ్స్‌లోనూ దూకుడుగా ఆడి ప్రత్యర్థిని చిత్తుచేసింది.
కాగా సింగిల్స్‌ విభాగంలో భారత పతక ఆశలు మోసిన కిడాంబి శ్రీకాంత్‌.. ఫైనల్స్‌లో తడబడి రన్నరప్‌గా నిలిచాడు. మెన్స్‌ సింగిల్స్‌ టైటిల్‌ పోరులో శ్రీకాంత్‌.. 16-21, 21-8, 20-22తో ప్రపంచ 59వ ర్యాంకర్‌ జేసన్‌ గునావన్‌ (హాంకాంగ్‌) చేతిలో ఓడిపోయాడు. చివరిసారిగా 2017లో బీడబ్ల్యూఎఫ్‌ టైటిల్‌ గెలిచిన శ్రీకాంత్‌.. 8 ఏండ్ల సుదీర్ఘ నిరీక్షణకు తెరదించాలని భావించిన ఫైనల్‌లో తడబడటంతో అతడికి మరోసారి నిరాశే మిగిలింది.
