Tennis Star love Story : టెన్నిస్ స్టార్లకు బోలెడు మంది అభిమానులు ఉంటారు. . తమ అభిమాన ఆటగాళ్లను కొందరు ఫ్యాన్స్ పిచ్చిగా ఆరాధిస్తారు. కంటపడితే చాలు.. సెల్ఫీ ప్లీజ్ అంటూ వెంటపడతారు. అయితే.. మరికొందరైతే ఏకంగా ప్రేమిస్తున్నా అని వెంటపడతారు. వాళ్ల ప్రేమ ఫలిస్తుందని చెప్పలేం. కానీ, ఒక అభిమాని తన ఆరాధ్య టెన్నిస్ ప్లేయర్ మనసు గెలుచుకున్నాడు. అవును.. ఆమె అతడితో ఏడడుగులు నడిచేందుకు ఓకే చెప్పింది. ఇంతకు ఆమె ఎవరో తెలుసా..? స్పెయిన్ టెన్నిస్ స్టార్ గర్బిన్ ముగురుజ(Garbiñe Muguruza). ఆమె త్వరలోనే అర్ధర్ బోర్జెస్(Arthur Borges) అనే అభిమానిని పెళ్లి చేసుకోబోతోంది. ఈరోజు వాళ్ల నిశ్చితార్థం ఘనంగా జరిగింది. అనంతరం బోర్జెస్తో ఉన్న ఫొటోలను ముగురుజా సోషల్మీడియాలో పోస్ట్ చేసింది.
ముగురుజ, అర్ధర్ బోర్జెస్ ప్రేమకథ ఎలా మొదలైందో తెలుసా? .. సెల్ఫీతో. అవును. 2021లో ముగురుజ యూసె ఓపెన్ ఆడేందుకు ఆమెరికా వెళ్లింది. అక్కడ న్యూయార్క్ వీధిలో బోర్జెస్ను మొదటిసారి చూసిందట. ‘నేను బస చేసిన హోటల్ సెంట్రల్ పార్క్కు దగ్గర్లో ఉంది. ఒకరోజు బోర్ కొట్టడంతో కాసేపు నడుద్దామని బయటకు వెళ్లాను. అక్కడ బోర్జెస్ను మొదటిసారి చూశాను. నన్ను గమనించిన అతను ఒక సెల్పీ అడిగాడు. అంతేకాదు ‘యూఎస్ ఓపెన్లో నీకు అదృష్టం కలిసి రావాలి’ అని అన్నాడు. నేను ఆలోచనల్లో పడిపోయా. ‘ఎంత అందంగా ఉన్నాడు’ అని నా మనసులో అనుకున్నా. అక్కడి నుంచి మా ప్రేమకథ మొదలైంది’ అని ముగురుజ చెప్పుకొచ్చింది.
ఆ రోజు నుంచి ఇద్దరూ ఫోన్లో మాట్లాడుకునేవాళ్లు. రెండేళ్ల తర్వాత బోర్జస్ ప్రపోజ్ చేశాడు. ఆక్షణం ముగురుజ కొంచెం కంగారుపడింది. సంతోషంతో ఆమె కళ్లలో నీళ్లు తిరిగాయి. ఆ వెంటనే ‘ఎస్’ చెప్పింది. అలా బోర్జస్ తన అభిమాన టెన్నిస్ స్టార్ను పెళ్లాడబోతున్నాడు. ముగురుజా ఇప్పటివరకు రెండు గ్రాండ్స్లామ్ టైటిళ్లు గెలిచింది. ఆమె 2016లో ఫ్రెంచ్ ఓపెన్, 2017లో వింబుల్డన్ చాంపియన్గా నిలిచింది. 15 వరల్డ్ టూర్ టైటిళ్లు సాధించింది.
ఫ్రెంచ్ ఓపెన్(2016) ట్రోఫీతో ముగురుజ