Visit:
న్యూఢిల్లీ: అంతర్జాతీయ క్రికెట్లో తొలిసారిగా భారత గడ్డపై ఓ సిరీస్కు ఆతిథ్యం ఇస్తున్న అఫ్గానిస్థాన్తో టీ20 సవాల్కు టీమిండియా సిద్ధమైంది. ఫ్రెండ్షిప్ కప్ పేరిట నిర్వహిస్తున్న మూడు టీ20ల సిరీస్లో భాగంగా ఆదివారం జరిగే తొలి పోరులో గెలుపే లక్ష్యంగా బరిలోకి దిగుతోంది. ఢిల్లీలోని లజ్పత్ నగర్ (మినీ కాబుల్) ప్రాంతంలో వేలాది మంది అఫ్గాన్లు నివసిస్తుండటంతో ఆ జట్టుకు అరుణ్ జైట్లీ స్టేడియం సొంతిల్లు లాంటి వాతావరణాన్ని అందిస్తోంది. జపాన్లో జరగనున్న ఆసియా గేమ్స్కు ఈ సిరీస్ను సన్నాహకంగా భావిస్తున్న భారత్ తమ అస్ర్తాలను సరిచూసుకోవాలని చూస్తోంది. మరోవైపు, ఫిబ్రవరిలో జరిగిన టీ20 వరల్డ్ కప్ తర్వాత మళ్లీ పొట్టి ఫార్మాట్ ఆడని అఫ్గాన్ జట్టు, అంతర్జాతీయ క్రికెట్లో ఇప్పటివరకు తాను ఓడించని ఏకైక ఫుల్ మెంబర్ జట్టు అయిన టీమిండియాపై తొలి విజయం సాధించి చరిత్ర సృష్టించాలని ఆశిస్తోంది.
ఈ మ్యాచ్కు ముందు తుది జట్టు ఎంపిక కెప్టెన్ శ్రేయస్ అయ్యర్, హెడ్ కోచ్ గౌతమ్ గంభీర్కు పెద్ద సవాలుగా మారింది. ముఖ్యంగా ఓపెనర్ స్థానం కోసం సీనియర్ సంజూ శాంసన్, 15 ఏండ్ల వండర్ బాయ్ వైభవ్ సూర్యవంశీ మధ్య తీవ్ర పోటీ నెలకొంది. శాంసన్ అనుభవం, సూర్యవంశీ పరాక్రమంలో దేనికి ఓటు వేయాలనే దానిపై యాజమాన్యం ఆలోచనలో పడింది. కీపర్ ఇషాన్ కిషన్ శుక్రవారం నెట్ ప్రాక్టీస్లో వెన్నునొప్పితో ఇబ్బంది పడ్డాడు. ఒకవేళ ఇషాన్ ఈ మ్యాచ్కు దూరమైతే శాంసన్, సూర్యవంశీ ఇద్దరూ తుది జట్టులోకి వచ్చే అవకాశం ఉంది. ఇక స్టార్ పేసర్ బుమ్రా, మిస్టరీ స్పిన్నర్ చక్రవర్తి, ఆల్రౌండర్ నితీష్ రెడ్డి పునరాగమనం చేయడం జట్టుకు కొండంత బలాన్నిస్తోంది. అర్ష్దీప్, అక్షర్, సుందర్తో జట్టు బలంగా ఉంది. ఎనిమిదో నంబర్లో స్పెషలిస్ట్ బౌలర్ను ఆడించాలా లేక బౌలింగ్ ఆల్రౌండర్ను దింపాలా అనేది శ్రేయస్ తేల్చుకోవాల్సి ఉంది.
అఫ్గానిస్థాన్ జట్టు కొత్త కెప్టెన్ ఇబ్రహీం జద్రాన్ సారథ్యంలో బరిలోకి దిగుతోంది. రషీద్ ఖాన్, నూర్ అహ్మద్, ముజీబ్ రెహ్మాన్తో కూడిన బలమైన స్పిన్ ధాటిని తట్టుకోవడం భారత బ్యాటర్లకు పరీక్ష కానుంది. స్టార్ లెగ్ స్పిన్నర్ రషీద్ అంతర్జాతీయ టీ20ల్లో 200 వికెట్లు తీసిన తొలి బౌలర్గా నిలిచేందుకు 7 వికెట్ల దూరంలో ఉన్నాడు. పేస్ విభాగంలో ఫజల్హక్ ఫారూఖీ, గాయం నుంచి కోలుకున్న నవీన్ ఉల్ హక్లు అఫ్గాన్ దళాన్ని నడిపిస్తున్నారు.
తుది జట్లు (అంచనా): భారత్: అభిషేక్, సూర్యవంశీ/ సంజూ శాంసన్, ఇషాన్ (కీపర్), అయ్యర్ (కెప్టెన్), తిలక్, అక్షర్, సుందర్, నితీష్ రెడ్డి, అర్ష్దీప్, బుమ్రా, చక్రవర్తి.
అఫ్గానిస్థాన్: రహ్మానుల్లా గుర్బాజ్ (కీపర్), ఇబ్రహీం జద్రాన్ (కెప్టెన్), గుల్బదిన్ ,సెదిఖుల్లా, రసూలీ, ఒమర్జాయ్, నబీ, రషీద్, ముజీబ్, నూర్, ఫజల్హక్, నవీన్.
