సన్‌రైజర్స్‌ కెప్టెన్‌ డేవిడ్‌ వార్నర్‌ అరుదైన రికార్డు

ఆస్ట్రేలియా విధ్వంసకర బ్యాట్స్‌మన్‌, సన్‌రైజర్స్‌ హైదరాబాద్‌ కెప్టెన్‌ డేవిడ్‌ వార్నర్‌ అరుదైన ఘనత సాధించాడు. టీ20 ఫార్మాట్‌లో వార్నర్‌ ఏకంగా 300 మ్యాచ్‌లు ఆడాడు. ఐపీఎల్‌ 14వ సీజన్‌లో భాగంగా బుధవారం రాయల్‌ ఛాలెంజర్స్‌ బెంగళూరుతో జరిగిన మ్యాచ్‌ ద్వారా వార్నర్‌ ఈ మైలురాయి చేరుకున్నాడు. 300 టీ20 మ్యాచ్‌లు ఆడిన 32వ ఆటగాడిగా ఆసీస్‌ స్టార్‌ వార్నర్‌ నిలిచాడు. ఐపీఎల్‌లో వార్నర్‌కు మంచి రికార్డు ఉంది. దాదాపు అన్ని సీజన్లలోనూ నిలకడగా ఆడుతూ వస్తున్న వార్నర్‌ 3 సార్లు ఆరెంజ్‌ క్యాప్‌(అత్యధిక పరుగుల వీరుడు) సొంతం చేసుకున్నాడు. 2015, 2017, 2019 సీజన్లలో టాప్‌ స్కోరర్‌గా నిలిచాడు. లీగ్‌లో ఇప్పటి వరకు 142 ఇన్నింగ్స్‌ల్లో 5254 పరుగులు సాధించాడు.