Sanjay Bangar | లియాన్ బౌలింగ్‌లో కోహ్లీ ఈ పొర‌పాట్లు చేయొద్దు.. ధాటిగా ఆడాలి : మాజీ బ్యాటింగ్ కోచ్

ఆస్ట్రేలియా స్టార్ స్పిన్న‌ర్ నాథ‌న్ లియాన్‌ను ఎదుర్కొనేట‌ప్పుడు విరాట్ కోహ్లీ దూకుడుగా షాట్లు ఆడాల‌ని భార‌త జ‌ట్టు మాజీ బ్యాటింగ్ కోచ్ సంజ‌య్ బంగ‌ర్ అన్నాడు. బోర్డ‌ర్ - గ‌వాస్క‌ర్ ట్రోఫీలో మొద‌టి టెస్టు ఫిబ్ర‌వరి 9న నాగ్‌పూర్‌లో మొద‌లుకానుంది. 

Sanjay Bangar  : ఆస్ట్రేలియా స్టార్ స్పిన్న‌ర్ నాథ‌న్ లియాన్‌ను ఎదుర్కొనేట‌ప్పుడు విరాట్ కోహ్లీ రెండు పొర‌పాట్లు చేయొద్ద‌ని భార‌త జ‌ట్టు మాజీ బ్యాటింగ్ కోచ్ సంజ‌య్ బంగ‌ర్ అన్నాడు. బోర్డ‌ర్ – గ‌వాస్క‌ర్ ట్రోఫీలో లియాన్ ఓవ‌ర్‌లో ఇబ్బంది ప‌డ‌కుండా ఉడేందుకు కోహ్లీకి ఆయ‌న కొన్ని సూచ‌న‌లు చేశాడు. స్టార్ స్పోర్ట్స్ గేమ్ ప్లాన్ షోలో బంగ‌ర్‌ మాట్లాడుతూ.. ‘లియాన్ ఓవ‌ర్‌లో కోహ్లీ ఈ రెండు పొరపాట్లు చేయొద్దు. అలాచేస్తే అత‌ను చాలా ఇబ్బంది ప‌డ‌తాడు. అందుక‌ని ఈ స్పిన్న‌ర్ ఓవ‌ర్‌లో దూకుడుగా షాట్లు ఆడాలి. అంతేకాదు అత‌ని బౌలింగ్‌లో విరాట్ కొంచెం లెగ్‌స్టంప్ దిశ‌గా ఉండి ఆడాలి. అప్పుడే స్వీప్ షాట్లు బాగా కొట్ట‌గ‌ల‌డు. దాంతో అత‌డిని భ‌య‌పెట్ట‌వ‌చ్చు. అంతేకాదు లియాన్‌కు ఎక్కువ డాట్ బాల్స్ వేసే అవ‌కాశం ఇవ్వ‌కూడదు’ అని తెలిపాడు. మ‌రో నాలుగు రోజుల్లో బోర్డ‌ర్ – గ‌వాస్క‌ర్ ట్రోఫీలో భాగంగా మొద‌టి టెస్టు నాగ్‌పూర్‌లో మొద‌లుకానుంది.

7 సార్లు కోహ్లీ ఔట్ 

స్వ‌దేశంలో అయినా, విదేశీ టూర్ అయినా ఆసీస్‌పై చెల‌రేగి ఆడే కోహ్లీ ఇప్పుడు సూప‌ర్ ఫామ్‌లో ఉన్నాడు. ఆసియా క‌ప్‌తో ఫామ్ అందిపుచ్చుకున్న అత‌ను వ‌న్డేల్లో రెండు నెల‌ల వ్య‌వ‌ధిలోనే మూడు శ‌త‌కాలు బాదాడు. దాంతో, బోర్డ‌ర్ – గ‌వాస్క‌ర్ సిరీస్‌లో అత‌డి నుంచే ఆస్ట్రేలియాకు ముప్పు ఉంది. దాంతో ఆసీస్ బౌల‌ర్లు అత‌డిని టార్గెట్ చేస్తారు. అయితే.. లియాన్ రూపంలో కోహ్లీకి అతి పెద్ద స‌వాల్ ఎదురుకానుంది. ఇప్ప‌టివ‌ర‌కూ ఈ స్పిన్న‌ర్ 18 టెస్టుల్లో 7 సార్లు కోహ్లీని ఔట్ చేశాడు. అదికూడా భార‌త గ‌డ్డ‌పై ఆరుసార్లు (2013లో మూడుసార్లు, 2017లో మూడుసార్లు) లియాన్ ఓవ‌ర్‌లో విరాట్ వికెట్ స‌మ‌ర్పించుకున్నాడు.