Rafael Nadal : మాజీ వరల్డ్ నంబర్ 1 రఫెల్ నాదల్ (Rafael Nadal) కెరీర్లో కష్టమైన దశను ఎదుర్కొంటున్నాడు. గాయం నుంచి కోలుకుని ఫ్రెంచ్ ఓపెన్(French Open) బరిలో నిలిచిన రఫా.. జర్మనీ సంచలనం అలెగ్జాండర్ జ్వెరెవ్ (Alexander Zverev) ధాటికి నిలవలేక మూడు సెట్లు కోల్పోయాడు. కెరీర్లో ఆఖరి ఫ్రెంచ్ ఓపెన్ ఆడేశానన్న బాధను తట్టుకోలేక కన్నీళ్లను దిగమింగుతూ కోర్టును వీడాడు. అయితే.. నాదల్ ప్రతిష్ఠాత్మక వింబుల్డన్ టోర్నమెంట్లోనూ ఆడడంపై సందేహం నెలకొంది.
”ప్రస్తుత పరిస్థితుల్లో మట్టి కోర్టు నుంచి గ్రాస్ కోర్టు మ్యాచ్లకు సిద్ధపడడం కష్టమైన పని. ఆ తర్వాత మట్టి కోర్టుపై ఒలింపిక్స్ మ్యాచ్లు జరుగుతాయి. అందుకని వింబుల్డన్ ఆడతానని ఇప్పుడే చెప్పలేన’ని నాదల్ మ్యాచ్ అనంతరం అన్నాడు. దాంతో, ఈసారి వింబుల్డన్ టోర్నీ కళ తప్పనుందని అభిమానులు అనుకుంటున్నారు.
గతంలో ఎన్నోసార్లు గాయాలు వేధించినా.. గోడకు కొట్టిన బంతిలా దూసుకొచ్చిన నాదల్ ఈసారి మునపటిలా ఆడలేకపోతున్నాడు. గత ఏడాది, ఈ ఏడాది ఆరంభంలో తొడ కండరాల గాయం కారణంగా పలు టోర్నీలకు దూరమైన రఫా.. కఠోర శ్రమతో మళ్లీ రాకెట్ పట్టాడు. అది కూడా తనకు అచ్చొచ్చిన ఫ్రెంచ్ ఓపెన్తో పునరాగమనం ఘనంగా చాటలని భావించాడు. కానీ, ఈ దిగ్గజ ఆటగాడి అశలకు జర్మనీ కుర్రాడు జ్వెరెవ్ చెక్ పెట్టాడు. అంతే.. టీనేజర్గా ట్రోఫీ గెలిచిన చోట ఓటమితో తొలి రౌండ్లోనే నాదల్ నిష్క్రమించాడు.