Kieron Pollard : వెస్టిండీస్ విధ్వంసక ఆల్రౌండర్ కీరన్ పోలార్డ్( Kieron Pollard) ఆడితే ఎలా ఉంటుందో తెలిసిందే. మంచినీళ్లు తాగినంత సులవుగా సిక్సర్లతో విరుచుకు పడే అతను ఫినిషర్గా పేరు తెచ్చుకున్నాడు. ఒకప్పుడు అంతర్జాతీయ క్రికెట్(International Cricket)లో ప్రకంపనలు సృష్టించిన ఈ విండీస్ ఆటగాడు మరోసారి దుమ్మురేపాడు. కరీబియన్ లీగ్(Caribbean Premier League 2023)లో వరుసగా నాలుగు 100 మీటర్ల సిక్స్లు(100 Meter Sixes) బాదాడు. ఈసారి అతడి వీర బాదుడుకు అఫ్గనిస్థాన్ యువ స్పిన్నర్ బలయ్యాడు.
విండీస్ మాజీ కెప్టెన్ అయని పోలార్డ్ కరీబియన్ లీగ్లో ట్రిన్బగో నైట్ రైడర్స్(Trinbago Knight Riders) తరఫున ఆడుతున్నాడు. సెయింట్ కిట్స్ అండ్ నెవిస్ పేట్రియాట్స్(St Kitts, Nevis Patriots) జట్టుతో జరిగిన మ్యాచ్లో ఈ ఆల్రౌండర్ ఆకాశమే హద్దుగా చెలరేగాడు. 15వ ఓవర్ వేసిన ఇజరుల్హక్ నవీద్(Izharulhaq Naveed)కు తన విశ్వరూపం చూపించాడు.
తన బలమంతా ఉపయోగించి వరుసగా నాలుగు బంతుల్ని వంద మీటర్ల సిక్సర్లుగా మలిచాడు. మొత్తంగా 16 బంతుల్లో 37 పరుగులు చేశాడు. దాంతో, నైట్ రైడర్స్ జట్టు 179 పరుగుల టార్గెట్ను మరో 17 బంతులు ఉండగానే ఛేదించింది. అంతేకాదు ఈ విజయంతో పొలార్డ్ జట్టు టోర్నీలో బోణీ కొట్టింది. పోలార్డ్ ఐపీఎల్లో ముంబై ఇండియన్స్(Mumbai Indians)కు ఎన్నో విజయాలు అందించాడు. గత సీజన్తో ఐపీఎల్కు వీడ్కోలు పలికిన అతను బ్యాటింగ్ కోచ్గా కొనసాగుతున్నాడు.