Ravi Dahiya : ఒలింపిక్స్లో సిల్వర్ మెడల్ గెలిచిన భారత స్టార్ రెజ్లర్ రవి దహియా(Ravi Dahiya)కు ఆసియా కప్ ట్రయల్స్(Asian Games Trails 2023,)లో చుక్కెదురైంది. ఇందిరా గాంధీ స్టేడియంలో ఈరోజు జరిగిన 57 కిలోల బౌట్లో దహియా అనూహ్యంగా ఓడిపోయాడు. ఏమంత గొప్ప రికార్డు లేని మహారాష్ట్రకు చెందిన అతిశ్ తోడ్కర్(Atish Todkar) చేతిలో కంగు తిన్నాడు. దాంతో, మ్యాట్ మీద చురుకుగా కదులుతూ ప్రత్యర్థి భరతం పట్టే రవి దహియా ఆశ్చర్యకర రీతిలో ఇంటిబాట పట్టాడు. దహియా ఆట, అతడి బలాబలాలా మీద అవగాహన ఉన్న అతిశ్ బరిలో ఏమాత్రం అవకాశం ఇవ్వలేదు. 20-8 పాయింట్లతో పూర్తి ఆధిపత్యం కనబరిచాడు.
టోక్యో ఒలింపిక్స్(Tokyo Olympics)లో రవి దహియా 57 కిలోల విభాగంలో వెండి పతకం సాధించాడు. బర్మింగ్హమ్లో జరిగిన కామన్వెల్త్ గేమ్స్(Commonwealth Games 2022)లో స్వర్ణం సాధించాడు. అయితే.. తరచూ గాయాలు వేధిస్తుండడంతో అతను ఈ ఏడాది పలు పోటీల్లో పాల్గొనలేదు. కుడి మోకాలులో యాంటెరియర్ క్రుసికేట్ లిగమెంట్(ACL), మీడియల్ కొల్లాటెరల్ లిగమెంట్(MCL) దెబ్బ తినడంతో మ్యాట్కు దూరంగా ఉన్నాడు. దాంతో, ఆటపై పట్టు కోల్పోయాడు.
రవి దహియా
ట్రయల్స్లో మునపటి వేగం చూపించలేకపోయాడు. అతీశ్ చేతిలో చిత్తుగా ఓడడం దహియా ఫిట్నెస్పై పలు సందేహాల్ని కలిగిస్తోంది. అయితే.. అతను మాత్రం అవన్నీ కొట్టిపారుస్తున్నాడు. వచ్చే ఏడాది ప్యారిస్ ఒలింపిక్స్(Parris Olympics 2024)లో స్వర్ణ పతకమే తన లక్ష్యమని చెప్తున్నాడు.