Navdeep Saini : భారత జట్టులో వరుసగా పెండ్లి బాజాలు మోగుతున్నాయి. ఈ ఏడాది కేఎల్ రాహుల్(KL Rahul), రుతురాజ్ గైక్వాడ్(Ruturaj Gaikwad) వివాహం చేసుకోగా.. తాజాగా యువ పేసర్ నవ్దీప్ సైనీ(Navdeep Saini) ఓ ఇంటివాడయ్యాడు. శుక్రవారం సైనీ తన ప్రేయసి స్వాతి ఆస్థాన(Swati Asthana)ని పెండ్లి చేసుకున్నాడు. తమ వివాహ వేడుకకు సంబంధించిన ఫొటోలను సైనీ ఇన్స్టాగ్రామ్లో పెట్టాడు.
‘నీతో ప్రతిరోజు ప్రేమతో నిండినదే. ఈరోజుతో మనం ఆ ప్రేమను శాశ్వతం చేస్తున్నాం. మా జీవితంలో కొత్త అధ్యాయాన్ని ప్రారంభిస్తున్న ఈ శుభ సమయంలో మీ అందరి ప్రేమ, ఆశీర్వాదాలు కోరుతున్నాం’ అని సైనీ క్యాప్షన్ రాశాడు. ఆ ఫొటోలకు చూసిన క్రికెటర్లు, అభిమానులు కొత్త జంటకు శుభాకాంక్షలు తెలుపుతున్నారు. సైనీ, స్వాతి కొనేండ్లుగా ప్రేమలో ఉన్నారు. స్వాతి ఒక వ్లాగర్. ఫ్యాషన్, ట్రావెల్, లైఫ్స్టయిల్ గురించి నిత్యం ఆన్లైన్లో వీడియోలు పెడుతుంటుంది.
హరియాణకు చెందిన సైనీ 2019లో టీ20ల్లో అరంగేట్రం చేశాడు. ఆ తర్వాత వన్డేల్లో, టెస్టు జట్టులో చోటు దక్కించుకున్నాడు. అతడు 2021 ఆస్ట్రేలియా పర్యటనలో చివరిసారి భారత్ తరఫున టెస్టు మ్యాచ్ ఆడాడు. ఈ ఏడాది రెస్ట్ ఆఫ్ ఇండియా(ROI) ఇరానీ కప్ గెలవడంలో సైనీ కీలకపాత్ర పోషించాడు. ఈ మధ్యే ముగిసిన సయ్యద్ ముస్తాక్ అలీ ట్రోఫీలో ఢిల్లీ తరఫున ఆడాడు.