Lionel Messi | మెస్సీ హోట‌ల్ గ‌ది ఇక‌పై మినీ మ్యూజియం

వ‌ర‌ల్డ్ క‌ప్ సంద‌ర్భంగా మెస్సీ బీ201 గ‌దిలో ఉన్నాడు

Lionel Messi : ఫిఫా వ‌ర‌ల్డ్ క‌ప్ ఫైన‌ల్లో అద్భుత ప్ర‌ద‌ర్శ‌న చేసిన లియోన‌ల్ మెస్సీకి అరుదైన గౌర‌వం ల‌భించ‌నుంది. వ‌ర‌ల్డ్ క‌ప్ సంద‌ర్భంగా అత‌ను బ‌స చేసిన హోట‌ల్ గ‌ది ఇక‌పై ప‌ర్యాట‌కుల‌ను ఆక‌ర్షించ‌నుంది. మెస్సీ ఉన్న రూమ్‌ను అధికారులు మినీ మ్యూజియంగా మార్చనున్నారు. వ‌ర‌ల్డ్ క‌ప్ సంద‌ర్భంగా మెస్సీ బీ201 గ‌దిలో ఉన్నాడు. ‘లియోన‌ల్ మెస్సీ బ‌స చేసిన గ‌దిలో ఎలాంటి మార్పులు చేయం. ఆ రూమ్‌ అలానే ఉంటుంది. అంతేకాదు అందులోకి సంద‌ర్శ‌కుల‌ను మాత్ర‌మే అనుమ‌తిస్తాం’ అని ఖ‌త‌ర్ యూనివ‌ర్సిటీ క‌మ్యూనికేష‌న్స్, ప‌బ్లిక్ రిలేష‌న్స్ డైరెక్ట‌ర్ హిత్మి అల్ హిత్మి వెల్ల‌డించారు. మెస్సీ గ‌దికి సంబంధించిన వీడ‌యోను ఖ‌త‌ర్ యూనివ‌ర్సిటీ ఇన్‌స్టాగ్రామ్‌లో షేర్ చేసింది.

మెస్సీ, సెర్గియో అగెరో బీ201 గదిని షేర్ చేసుకున్నారు. ట్రోఫీ అందుకున్న త‌ర్వాత మెస్సీ, జ‌ట్టు స‌భ్యుల‌తో క‌లిసి ఇదే గ‌దిలో సంబ‌రాలు చేసుకున్నాడు. దాంతో, మెస్సీ, అర్జెంటీనా విజ‌యానికి గుర్తుగా ఈ గ‌దిని ఖ‌త‌ర్ యూనివ‌ర్సిటీ అధికారులు చిన్న‌పాటి మ్యూజియంగా చేయ‌ల‌నుకున్నారు. దాంతో, ఇక‌పై ఎవ‌రూ ఈ రూమ్‌ను బుక్ చేసుకోవ‌డం కుద‌ర‌దు. ఆ గదిలో అర్జెంటీనా జ‌ట్టు స‌భ్యుల ఫొటోలు, వాళ్ల గెలుపు సంబ‌రాల గుర్తులు ఇక‌పై సంద‌ర్శ‌కుల‌ను ఆక‌ట్టుకోనున్నాయి.

హోరాహోరీగా జ‌రిగిన ఫైన‌ల్ మ్యాచ్ అభిమానుల‌ను మునివేళ్ల‌పై నిల‌బెట్టింది. ఫుట్‌బాల్ చ‌రిత్ర‌లో గొప్ప మ్యాచ్‌గా గుర్తింపు పొందింది. ఫైనల్లో అర్జెంటీనా షూటౌట్‌లో 4-2తో ఫ్రాన్స్‌పై గెలుపొందింది. ఎంబాపే హ్యాట్రిక్ గోల్స్ కొట్టి హ‌డ‌లెత్తించాడు. అత్య‌ధికంగా 8 గోల్స్ చేసిన అత‌నికి గోల్డెన్ బూట్ అవార్డు ల‌భించింది. మెస్సీ 7 గోల్స్‌తో రెండో స్థానంలో నిలిచాడు.

 

View this post on Instagram

 

A post shared by جامعة قطر (@qataruniversity)