వరల్డ్‌కప్‌ హీరో: వన్డేలకు రిటైర్మెంట్‌ ప్రకటించిన స్టార్‌ ఆల్‌రౌండర్‌

ఐర్లాండ్‌ స్టార్‌ ఆల్‌రౌండర్‌ కెవిన్ ఒబ్రెయిన్(37) వన్డే క్రికెట్‌కు రిటైర్మెంట్‌ ప్రకటించాడు. ఈ ఫార్మాట్‌లో కొనసాగాలనే ఆసక్తి, ప్రేమ తనకు లేదని పేర్కొన్నాడు. టెస్టు, టీ20 క్రికెట్‌కు మ్యాచ్‌లకు అందుబాటులో ఉండనున్నాడు. ఐర్లాండ్‌కు 15ఏండ్ల పాటు ప్రాతినిధ్యం వహించాను. వన్డే క్రికెట్‌ నుంచి వైదొలగడానికి, రిటైర్మెంట్‌ ప్రకటించడానికి ఇదే సరైన సమయమని భావిస్తున్నాను అని ఒబ్రెయిన్‌ వివరించాడు.

2006లో అరంగేట్రం చేసిన కెవిన్‌ 153 వన్డేల్లో 3,618 పరుగులు చేయగా, మీడియం పేస్‌తో 114 వికెట్లు పడగొట్టాడు. ఆ దేశం తరఫున అత్యధిక వికెట్ల రికార్డు తనపేరిట ఉన్నది. భారత్‌ ఆతిథ్యమిచ్చిన 2011 వన్డే ప్రపంచకప్‌ ద్వారా కెవిన్‌ ఒక్కసారిగా స్టార్‌ బ్యాట్స్‌మన్‌గా మారిపోయాడు. తన సత్తా ఏంటో ప్రపంచానికి చూపించాడు. వరల్డ్‌కప్‌లో భాగంగా బెంగళూరు వేదికగా ఇంగ్లాండ్‌తో జరిగిన మ్యాచ్‌లో ఒబ్రెయిన్ రికార్డు శతకం బాదేశాడు. కేవలం 50 బంతుల్లోనే 100 పరుగుల మార్క్‌ చేరుకున్నాడు.

మొదట బ్యాటింగ్‌ చేసిన ఇంగ్లాండ్‌ 327 పరుగులు చేసింది. అనంతరం లక్ష్య ఛేదనలో ఒబ్రెయిన్‌(113 రన్స్‌) మెరుపు సెంచరీ సాధించడంతో ఐర్లాండ్‌ అలవోకగా విజయం సాధించింది. వన్డే ప్రపంచకప్‌లో ఇదే అత్యంత వేగవంతమైన శతకంగా నిలిచింది.