Chess : అరవై నాలుగు గడుల చదరంగం(Chess) ఆటలో భారతీయులు పలు రికార్డులు నెలకొల్పారు. విశ్వనాథన్ ఆనంద్ (Vishwanathan Anad) నుంచి యువ కెరటం ఆర్ ప్రజ్ఞానంద(R Praggnanandhaa) వరకూ పలువురు ప్రతిష్ఠాత్మకమైన గ్రాండ్ మాస్టర్ హోదా పొందారు. తాజాగా ఈ జాబితాలో భారతీయ మూలాలున్న ఎనిమిదేండ్ల అమ్మాయి చేరింది. పసి ప్రాయంలోనే చెస్లో గొప్పగా రాణిస్తున్న ఆ చిన్నారి పేరు బోధన శివానందనన్(Bodhana Sivanandan). తాజాగా క్రొయేషియాలో జరిగిన యూరోపియన్ ర్యాపిడ్, బ్లిట్జ్ చాంపియన్షిప్లో బోధన అద్భుతం చేసింది.
తనకంటే 30 ఏండ్ల పెద్దదైన, ఎంతో అనుభవజ్ఞురాలైన క్రీడాకారిణిని బోధన అవలీలగా ఓడించింది. మ్యాచ్ ఆరంభం నుంచి తన ఎత్తులతో ప్రత్యర్థిని కంగారెత్తించిన బోధన 8.5 12తో విజేతగా నిలిచి దిగ్గజాలను ఫిదా చేసింది. అంతేకాదండోయ్ ‘అత్యుత్తమ మహిళా ప్లేయర్'(Best Female Player) టైటిల్ సొంతం చేసుకుంది. దాంతో, అందరూ ఆమె ప్రతిభను మెచ్చుకుంటూ సలాం కొడుతున్నారు.
బ్రిటన్ ప్రధాని రిషి సునాక్, భవాని
అంతర్జాతీయ వేదకపై అద్భుతంగా రాణించిన బోధన ప్రతిభకు చెస్ దిగ్గజాలు ఫిదా అవుతున్నారు. ఈ ఏడాది ఆరంభంలో బ్రిటన్ ప్రధాని రిషి సునాక్(Rishi Sunak) సైతం బోధనను ఎంతో మెచ్చుకున్నారు. అయితే.. బోధనకు చిన్నప్పటి నుంచి చెస్ ఆడడం తెలియదని ఆమె తండ్రి శివానందన్ వెలయుథమ్(Sivanandan Velayutham) అంటున్నాడు. నా కూతురు చెస్ ఆడడం మొదలుపెట్టి మూడేండ్లు మాత్రమే అవుతోంది. కానీ, తక్కువ సమయంలోనే తను బాగా మెరుగయింది. పోటీ పడిన ప్రతి టోర్నమెంట్లో బోధన ఉత్తమంగా ఆడేందుకు ప్రయత్నిస్తోంది. ఈ టోర్నమెంట్లో ఆమెకు అన్నీ కలిసొచ్చాయి అని శివానందన్ తెలిపాడు.