Steven Finn : మాజీ చాంపియన్ ఇంగ్లండ్(England) జట్టుకు మరో షాక్. విధ్వంసక ఓపెనర్ అలెక్స్ హేల్స్(Alex Hales) వీడ్కోలు విషయం మరవకముందే మరో క్రికెటర్ ఆటకు గుడ్ బై చెప్పేశాడు. అవును ఫాస్ట్ బౌలర్ స్టీవెన్ ఫిన్(Steven Finn) ఈరోజు అంతర్జాతీయ క్రికెట్కు రిటైర్మెంట్ పలికాడు. గత ఏడాది కాలంగా అనారోగ్యంతో బాధ పడుతున్నానని, అందుకనే ఆట నుంచి తప్పుకుంటున్నానని ఫిన్ తన వీడ్కోలు ప్రకటనలో తెలిపాడు.
‘గత 12 నెలలుగా నా శరీరంతో పోరాడుతున్నా. చివరకు అలసిపోయానని ఒప్పుకుంటున్నా. ఇన్నిరోజులు క్రికెట్ ఆడినందుకు చాలా అదృష్టంగా భావిస్తున్నా. 2005లో అరంగేట్రం చేశాను. అయితే… ఇన్నేళ్ల ప్రయాణంలో ఎన్నో ఒడిదొడుకులు ఎదుర్కొన్నాం. అయినా కూడా వాటన్నింటినీ ఇష్టంగానే స్వీకరించా. ఇంగ్లండ్ తరఫున మూడు ఫార్మాట్లలో కలిపి 125 గేమ్లు ఆడాను. ఇంతకంటే ఎక్కువ ఇంకేం కోరుకోను’ అని ఫిన్ వెల్లడించాడు.
భారత జట్టుపై 2012లో ఐదు వికెట్లు తీసిన ఫిన్
కుడి చేతివాటం బౌలర్ అయిన ఫిన్ కౌంటీల్లో మిడిల్సెక్స్ జట్టుకు ఆడాడు. ఫస్ట్ క్లాస్లో అద్భుతంగా రాణించిన ఈ పొడగరి బౌలర్ జాతీయ జట్టులోకి వచ్చాడు. కచ్చితత్వంతో పాటు అదనపు బౌన్స్ రాబట్టగల ఫిన్ను అప్పట్లో ఆసీస్ లెజెండ్ గ్లెన్ మెక్గ్రాత్(Glenn Mcgrath)తో పోల్చేవారు. భారత జట్టుపై 2012లో ఐదు వికెట్లతో సత్తా చాటాడు. ఇంగ్లండ్ తరఫున 36 టెస్టులు, 69 వన్డేలు, 21 టీ20 మ్యాచ్లు ఆడాడు. టెస్టుల్లో 30.40 సగటుతో 125 వికెట్లు తీశాడు. అతడి అత్యుత్తమ ప్రదర్శన 6/125. వన్డేల్లోనూ అదరగొట్టిన ఫిన్ 102 వికెట్లు ఖాతాలో వేసుకున్నాడు.