ఎంగేజ్‌మెంట్ రింగ్‌తో స్టార్ క్రికెట‌ర్‌

మెల్‌బోర్న్‌: ఆస్ట్రేలియా ఆల్‌రౌండ‌ర్ మిచెల్ మార్ష్ ఎంగేజ్‌మెంట్‌ త‌న గ‌ర్ల్‌ఫ్రెండ్ గ్రెటా మాక్‌తో జ‌రిగింది. త‌న వేలికి ఎంగేజ్‌మెంట్ రింగ్ ఉన్న ఫొటోను మార్ష్ రిలీజ్ చేశాడు. వ‌చ్చే నెల‌లో జ‌ర‌గ‌నున్న టీ20 వ‌ర‌ల్డ్‌క‌ప్ కోసం ఎంపిక చేసిన ఆస్ట్రేలియా టీమ్‌లో మార్ష్ కూడా ఉన్నాడు. టోర్నీ ఆరంభానికి స‌రిగ్గా నెల రోజుల ముందు మార్ష్ ఎంగేజ్‌మెంట్ జ‌ర‌గ‌డం విశేషం. త‌న ఇన్‌స్టాగ్రామ్ అకౌంట్ ద్వారా మార్ష్ ఎంగేజ్‌మెంట్ విష‌యాన్ని చెప్పాడు. ఏడాదిన్న‌ర కాలంగా మిచెల్ మార్ష్‌, గ్రెట్ మాక్ డేటింగ్‌లో ఉన్నారు.

మిచెల్ మార్ష్ ఈ మ‌ధ్య కాలంలో మంచి ఫామ్‌లో ఉన్నాడు. వెస్టిండీస్‌తో సిరీస్‌లో ఆల్‌రౌండ్ ప‌ర్ఫార్మెన్స్‌తో అద‌ర‌గొట్టాడు. ఐదు టీ20ల సిరీస్‌లో 219 ప‌రుగులు చేయ‌డం విశేషం. అంతేకాదు 8 వికెట్లు కూడా తీశాడు. ఆ త‌ర్వాత బంగ్లాదేశ్‌తో జ‌రిగిన ఐదు టీ20ల సిరీస్‌లోనూ మార్ష్ 156 ప‌రుగులు చేసి రాణించాడు.