AUS vs BAN: వన్డే వరల్డ్ కప్లో ఆస్ట్రేలియా వరుసగా ఏడో విజయాన్ని నమోదుచేసింది. పూణేలోని మహారాష్ట్ర క్రికెట్ అసోసియేషన్ స్టేడియం వేదికగా బంగ్లాదేశ్తో ముగిసిన మ్యాచ్లో ఆసీస్.. 8 వికెట్ల తేడాతో ఘనవిజయం నమోదుచేసింది. బంగ్లాదేశ్ నిర్దేశించిన 307 పరుగుల లక్ష్యాన్ని ఆసీస్.. 44.4 ఓవర్లలోనే ఛేదించింది.ఇటీవల అఫ్గానిస్తాన్పై గ్లెన్ మ్యాక్స్వెల్ విధ్వంసాలు మరిచిపోకముందే ఈ మ్యాచ్లో ఆసీస్ స్టార్ బ్యాటర్ మిచెల్ మార్ష్.. 132 బంతుల్లోనే 17 బౌండరీలు, 9 భారీ సిక్సర్ల సాయంతో 177 పరుగులు చేసి అజేయంగా నిలిచి అభిమానులను అలరించాడు. డేవిడ్ వార్నర్ (61 బంతుల్లో 53, 6 ఫోర్లు), స్టీవ్ స్మిత్ (64 బంతుల్లో 63 నాటౌట్, 4 ఫోర్లు, 1 సిక్స్)లు రాణించారు.
భారీ ఛేదనలో ఆసీస్.. మూడో ఓవర్లోనే ఓపెనర్ ట్రావిస్ హెడ్ (10) వికెట్ను కోల్పోయింది. బంగ్లాదేశ్కు ఇదొక్కటే కాస్త సంతోషించే విషయం. ఆ తర్వాత వార్నర్, మార్ష్ లు రెండో వికెట్కు 122 పరుగులు జోడించారు. వార్నర్ నిష్క్రమించినా .. మార్ష్ బంగ్లాదేశ్ బౌలర్లను చితక్కొట్టాడు. 37 బంతుల్లోనే అర్థ సెంచరీ చేసిన మార్ష్.. 87 బంతుల్లో సెంచరీ పూర్తిచేశాడు. సెంచరీ తర్వాత మార్ష్ వీరవిహారం మరో స్థాయికి వెళ్లింది. దొరికిన బంతిని దొరికినట్టు బౌండరీ లైన్ దాటించిన మార్ష్.. 117 బంతుల్లోనే 150 పరుగుల మార్కు దాటాడు. మరో ఎండ్లో స్మిత్ కూడా రెచ్చిపోవడంతో ఆసీస్ స్కోరుబోర్డు రాకెట్ వేగాన్ని తలపించింది. ఈ ఇద్దరూ బాదడంతో ఆసీస్ లక్ష్యాన్ని 44.4 ఓవర్లలోనే ఛేదించింది.