Ravichandran Ashwin : భారత జట్టు సీనియర్ స్పిన్నర్ రవిచంద్రన్ అశ్విన్(Ravichandran Ashwin) ఇంగ్లండ్(England) పర్యటనకు సన్నద్ధమవుతున్నాడు. సొంతగడ్డపై తిరుగులేని రికార్డు ఉన్న ఈ స్టార్ బౌలర్ ఇంగ్లీష్ బ్యాటర్లను తన స్పిన్తో ఉక్కిరిబిక్కిరి చేసేందుకు కాచుకొని ఉన్నాడు. ఇంగ్లండ్తో జరిగే ఐదు టెస్టుల సిరీస్లో అశ్విన్ను అరుదైన రికార్డులు ఊరిస్తున్నాయి.
ఈ సిరీస్లో అశ్విన్ మరో 10 వికెట్లు తీస్తే 500 క్లబ్లో చేరుతాడు. 13 వికెట్లు పడగొడితే లెజెండరీ బౌలర్ అనిల్ కుంబ్లే(Anil Kumble) రికార్డును బద్ధలు కొట్టి… స్వదేశంలో అత్యధిక వికెట్లు తీసిన బౌలర్గా అశ్విన్ రికార్డు సృష్టిస్తాడు. ప్రస్తుతం కుంబ్లే 350 వికెట్లతో టాప్లో కొనసాగుతున్నాడు.
ప్రపంచంలోని మేటి బౌలర్లలో ఒకడైన అశ్విన్ ఇప్పటివరకూ స్వదేశంలో 55 టెస్టులు ఆడాడు. 20.87 సగటు, 2.68 ఎకానమీతో 337 వికెట్లు పడగొట్టాడు. అంతేకాదు రికార్డు స్థాయిలో 26 సార్లు 5 వికెట్లు తీసిన అశ్విన్ ఆరు పర్యాయాలు 10 వికెట్ల ప్రదర్శన చేశాడు. స్వదేశంలో, విదేశాల్లో కలిపి అశ్విన్ ఖాతాలో 490 వికెట్లు ఉన్నాయి. మరో 10 వికెట్లు తీస్తే 500 వికెట్ల క్లబ్లో చేరుతాడు. ఇప్పటివరకూ 8మంది బౌలర్లు 500 క్లబ్లో చోటు దక్కించుకున్నారు.
లియాన్, షేన్ వార్న్, మురళీధరన్
శ్రీలంక లెజెండ్ ముత్తయ్య మురళీధరన్ 800 వికెట్లతో అగ్రస్థానంలో ఉన్నాడు. దివంగత ఆస్ట్రేలియా స్పిన్నర్ షేన్ వార్న్ 708 వికెట్లతో రెండో స్థానంలో.. ఇంగ్లండ్ వెటరన్ బౌలర్ జేమ్స్ అండర్సన్ 690 వికెట్లతో మూడో స్థానంలో నిలిచారు. భారత దిగ్గజం అనిల్ కుంబ్లే 619 వికెట్లతో నాలుగో స్థానంలో.. ఇంగ్లండ్ పేసర్ స్టువార్ట్ బ్రాడ్ 604 వికెట్లతో ఐదో స్థానంలో కొనసాగుతున్నారు. మెగ్గ్రాత్(ఆస్ట్రేలియా) 563, కొర్నే వాల్ష్(వెస్టిండీస్) 519, నాథన్ లియాన్(ఆస్ట్రేలియా) 512 వికెట్లతో వరుసగా ఆరు, ఏడు, ఎనిమిది స్థానాల్లో ఉన్నారు.
ఇంగ్లండ్, భారత్ జట్ల మధ్య జనవరి 25న ఉప్పల్ స్టేడియంలో తొలి టెస్టు షురూ కానుంది. ఫిబ్రవరి 2న విశాఖపట్టణంలో రెండో టెస్టు, రాజ్కోట్లో ఫిబ్రవరి 15న మూడో టెస్టు, రాంచీలో ఫిబ్రవరి 23న నాలుగో టెస్టు, ధర్మశాలలో మార్చి 7న ఆఖరి టెస్టు జరుగనుంది.