PSLV C-53 ప్రయోగానికి కౌంట్‌డౌన్‌ షురూ.. రేపు రాకెట్‌ను నింగిలోకి పంపనున్న ఇస్రో

శ్రీహరికోట : భారత అంతరిక్ష పరిశోధనా సంస్థ (ఇస్రో) పోలార్ శాటిలైట్ లాంచ్ వెహికల్స్ (PSLV)లో రాకెట్‌ను గురువారం నింగిలోకి పంపనున్నది. ఈ మేరకు PSLV C-53 మిషన్‌ కౌంట్‌డౌన్‌ను శాస్త్రవేత్తలు ప్రారంభించారు. పీఎస్‌ఎల్‌వీ రాకెట్‌ మూడు ఉపగ్రహాలను అంతరిక్షంలోకి తీసుకెళ్లనున్నది. సింగపూర్‌కు చెందిన మూడు ఉపగ్రహాలను న్యూస్పేస్‌ ఇండియా లిమిటెడ్‌తో ఒప్పందం మేరకు ఇస్రో PSLV C-53 మిషన్‌ చేపడుతున్నది. శ్రీహరికోటలోని సతీశ్‌ ధావన్‌ స్పేస్‌ సెంటర్‌లో రెండో లాంచ్‌ ప్యాడ్‌ నుంచి సాయంత్రం 6 గంటలకు రాకెట్‌ నింగిలోకి దూసుకెళ్లనున్నది. ఈ క్రమంలోనే ఇస్రో శాస్త్రవేత్తలు బుధవారం సాయంత్రం 5 గంటలకు కౌంట్‌డౌన్‌ను ప్రారంభించారు. ఇది నిరంతరాయంగా 25 గంటల పాటు కౌంట్‌డౌన్‌ కొనసాగిన అనంతరం.. 30న సాయంత్రం 6 గంటలకు పీఎస్ఎల్వీ వాహకనౌక నింగిలోకి దూసుకెళ్లనుంది.

మూడు గ్రహాలు నింగిలోకి..

పీఎస్‌ఎల్‌వీ సీ-53 వాహక నౌక మూడు ఉపగ్రహాలను నింగిలోకి మోసుకెళ్లనున్నది. ఒకటి డీఎస్‌-ఈఓ (DS-EO). దీని బరువు 365 కిలోలు. మరో ఉపగ్రహం సింగపూర్‌కు చెందిన న్యూసార్ ‘NeuSAR). దీని బరువు 155 కిలోలు. రిపబ్లిక్ ఆఫ్ కొరియాలోని స్టారెక్ ఇనిషియేటివ్ శాస్త్రవేత్తలు తయారు చేశారు. మూడో ఉపగ్రహం స్కూబ్‌-I (SCOOB-I). నాన్యాంగ్ టెక్నలాజికల్ యూనివర్సిటీ (NTU) రూపొందించింది. దీని బరువు కేవలం 2.8 కిలోలే. DS-EO ఉపగ్రహం 0.5 రిజల్యూషన్ ఇమేజింగ్ సామర్థ్యాన్ని కలిగి ఉంటుంది. సింగపూర్‌కు చెందిన న్యూసార్ ఉపగ్రహం సార్‌ పేలోడ్‌ను మోసుకెళ్లే మొట్టమొదటి చిన్న వాణిజ్య ఉపగ్రహం. ఈ ఉపగ్రహం పగలు, రాత్రి, అన్ని వాతావరణ పరిస్థితుల్లో చిత్రాలను అందించనున్నది. మూడో ఉపగ్రహం SCOOB-I స్టూడెంట్ శాటిలైట్ సిరీస్ (S3-I). సింగపూర్‌లోని ఎన్‌టీయూ స్కూల్ ఆఫ్ ఎలక్ట్రికల్ అండ్ ఎలక్ట్రానిక్ ఇంజినీరింగ్‌లోని శాటిలైట్ రీసెర్చ్ సెంటర్ విద్యార్థులు రూపొందించారు.

పీఎస్‌ఎల్‌వీ 55వ మిషన్..

పీఎస్‌ఎల్‌వీ 55వ మిషన్‌ ఇది. పీఎస్‌ఎల్‌వీ-కోర్ అలోన్ వేరియంట్‌ను ఉపయోగించి చేస్తున్న 15వ మిషన్‌గా ఇస్రో అధికారులు తెలిపారు. ఇంకా షార్‌లోని రెండో లాంచ్‌ ప్యాడ్‌ నుంచి ప్రయోగిస్తున్న 16వ పీఎస్ఎల్వీ రాకెట్ ఇది. ప్రయోగం నాలుగు దశల్లో జరుగనున్నది. 44.4 మీటర్ల పొడవు గల PSLV-C53 వాహక నౌక. DS-EO ఉపగ్రహాన్ని 570 కిలోమీటర్ల ఎత్తులో అంతరిక్షంలో ప్రవేశపెట్టనున్నది. ఆ తర్వాత మిగతా ఉపగ్రహాలను కూడా కక్ష్యల్లో ప్రవేశపెడుతుంది.