రిక్రూటింగ్ కంపెనీలో లేఆఫ్స్‌ : లింక్డిన్ ఉద్యోగుల‌పై వేటు

లింక్డిన్ త‌న రిక్రూటింగ్ టీం నుంచి ప‌లువురు ఉద్యోగుల‌ను తొల‌గించింది. ప‌లు విభాగాల్లో 10,000 మందిని తొల‌గించాల‌న్న మైక్రోసాఫ్ట్ ప్ర‌ణాళిక‌ల్లో భాగంగానే లింక్డిన్‌లో లేఆఫ్స్ చోటుచేసుకున్నాయి.

న్యూఢిల్లీ : ఉద్యోగార్ధుల‌కు నూత‌న ఉద్యోగాల కోసం వారిని రిక్రూట‌ర్ల‌తో క‌నెక్ట్ చేసే వేదిక లింక్డిన్‌లోనూ కొలువుల కోత క‌ల‌క‌లం రేపింది. లింక్డిన్ త‌న రిక్రూటింగ్ టీం నుంచి ప‌లువురు ఉద్యోగుల‌ను తొల‌గించింది. ప‌లు విభాగాల్లో 10,000 మందిని తొల‌గించాల‌న్న మైక్రోసాఫ్ట్ ప్ర‌ణాళిక‌ల్లో భాగంగానే లింక్డిన్‌లో లేఆఫ్స్ చోటుచేసుకున్నాయి. లింక్డిన్‌లో ఎంత‌మంది ఉద్యోగుల‌పై వేటు ప‌డుతుంద‌నే వివ‌రాలు ఇంకా వెల్ల‌డికాలేదు. కాగా హోలోలెన్స్‌, ఎక్స్‌బాక్స్ వంటి ఇత‌ర మైక్రోసాఫ్ట్ కంపెనీల్లోనూ కొలువుల కోత‌పై గ‌త వారం క‌ధ‌నాలు వెల్ల‌డ‌య్యాయి.

మ‌రోవైపు ప‌లువురు లింక్డిన్ రిక్రూటింగ్ టీం ఉద్యోగులు తాము కంపెనీ నుంచి దూర‌మ‌వుతున్నామ‌ని ప్లాట్‌ఫాంపై పోస్ట్ చేయ‌డంతో లింక్డిన్ లేఆఫ్స్ విష‌యం వెలుగులోకి వ‌చ్చింది. లింక్డిన్‌లో ఉద్యోగం కోల్పోయిన వారిలో తాను ఒక‌రిన‌ని ఉద్యోగి నికోల్ జ‌వ‌కి రాసుకొచ్చారు. న్యూ రోల్ కోసం ప్ర‌యత్నిస్తున్నాన‌ని ఆమె అదే ప్లాట్‌ఫాంను ఆశ్ర‌యించారు.

లింక్డిన్‌లో కొలువు కోల్పోయిన టెక్నిక‌ల్ రిక్రూట‌ర్ ఎమిలీ బియ‌ర్స్ త‌న లేఆఫ్‌పై రాసుకొస్తూ లింక్డిన్‌లో త‌న ప్ర‌స్ధానం ముగియ‌డం దుర‌దృష్ట‌క‌ర‌మ‌ని, ఉద్యోగుల తొల‌గింపులో టెక్నిక‌ల్ రిక్రూట‌ర్ రోల్‌ను కోల్పోయాన‌ని పేర్కొన్నారు. లింక్డిన్‌లో కొలువు కోల్పోయిన సీనియ‌ర్ రిక్రూట‌ర్ మెల‌నీ క్వాండ్ త‌న ఆవేద‌న వెళ్ల‌గ‌క్కారు. కంపెనీ నుంచి తొల‌గిస్తూ క‌ల్పించిన అర‌కొర ప్ర‌యోజ‌నాలు, ప‌రిహార ప్యాకేజ్‌తో తాను పూర్తిగా నిరాశ చెందాన‌ని రాసుకొచ్చారు.