Elon Musk-Twitter | సంస్థను లాభాల బాట పట్టించేందుకు కష్టపడి పని చేస్తారా.. ఇంటికెళ్లిపోతారా? అని ఎలన్మస్క్ జారీ చేసిన ఆల్టిమేటమ్ గడువు పూర్తవ్వడంతో దాదాపు 1200 మంది ట్విట్టర్ ఉద్యోగులు రాజీనామా చేయాలని నిర్ణయించుకున్నారు. ఈ నేపథ్యంలో ట్విట్టర్లోని సాఫ్ట్వేర్ ఇంజినీర్లంతా శాన్ఫ్రాన్సిస్కోలోని సంస్థ ప్రధాన కార్యాలయానికి రావాలని వారికి ఎలన్మస్క్ ఈ-మెయిల్ పంపారు. భౌతికంగా బే-ఏరియాకు రాలేని వారు, కుటుంబ అత్యవసర పరిస్థితులు ఉన్న వారిని మినహాయిస్తున్నట్లు ఆ ఈ-మెయిల్లో పేర్కొన్నారు.
గత నెలాఖరులో ట్విట్టర్ను టేకోవర్ చేయగానే 7500 మంది సిబ్బందిలో సగం మందిని ఎలన్మస్క్ ఇంటికి పంపేశారు. మస్క్ తీసుకుంటున్న సంచలన నిర్ణయాలతో మరో 1200 మంది నిష్క్రమించడానికి రంగం సిద్ధమైంది.
గత ఆరు నెలలుగా ట్విట్టర్లో సాఫ్ట్ వేర్ ఇంజినీర్లు తయారు చేసిన కోడింగ్పై బ్లూ-ప్రింట్ సమ్మరీ అంద జేయాలని ఎలన్మస్క్ కోరినట్లు తెలుస్తున్నది. సాఫ్ట్వేర్ ఇంజినీర్లు ఇచ్చే బ్లూ ప్రింట్ సమ్మరీతో ట్విట్టర్లో టెక్నాలజీ పనితీరును అర్థం చేసుకునేందుకు వీలవుతుందని ఆయన పేర్కొన్నట్లు సమాచారం. సామూహికంగా ఉద్యోగులు వైదొలుగుతారన్న సంకేతాల మధ్య ప్రపంచవ్యాప్తంగా పలు చోట్ల ట్విట్టర్ కార్యాలయాలు మూసేస్తున్నట్లు ప్రకటించిన తర్వాత కొన్ని గంటలకు సిబ్బందికి ఎలన్మస్క్ మెయిల్ పంపడం గమనార్హం.