BRS | రాజేంద్రనగర్‌ యూత్‌ కాంగ్రెస్‌కు షాక్‌… బీఆర్‌ఎస్‌లోకి దుడ్డు ఆకాష్‌

రాజేంద్రనగర్‌ నియోజకవర్గంలో కాంగ్రెస్‌ పార్టీకి ఎదురుదెబ్బ తగిలింది.

మణికొండ,అక్టోబర్‌ 14 : రాజేంద్రనగర్‌ నియోజకవర్గంలో కాంగ్రెస్‌ పార్టీకి ఎదురుదెబ్బ తగిలింది. నార్సింగి డివిజన్‌కు చెందిన రాజేంద్రనగర్‌ నియోజకవర్గ యూత్‌ కాంగ్రెస్‌ ఉపాధ్యక్షుడు దుడ్డు ఆకాష్‌ కాంగ్రెస్‌ పార్టీకి, తన పదవికి రాజీనామా చేసి బీఆర్‌ఎస్‌లో బుధవారం చేరారు. మాజీ మంత్రి, ఎమ్మెల్యే పట్లోళ్ల సబితా ఇంద్రారెడ్డి, నియోజకవర్గ ఇంచార్జీ కార్తీక్‌రెడ్డిల ఆధ్వర్యంలో ఆయన గులాబీ కండువా కప్పుకున్నారు. కాంగ్రెస్‌ పార్టీని వీడి బీఆర్‌ఎస్‌ చేరిన దుడ్డు ఆకాష్‌కు పార్టీ నాయకులు స్వాగతం పలికారు. ఈ సందర్భంగా ఆకాష్‌ మాట్లాడుతూ ప్రజాసంక్షేమం కోసం నిరంతరం పాటుపడే సబితారెడ్డి నేతృత్వంలో పనిచేయాలనే సంకల్పంతో కాంగ్రెస్‌ పార్టీని వీడటం జరిగిందన్నారు.

కాంగ్రెస్‌ పార్టీలో యువకులకు సరైన గుర్తింపు లేకపోవడం, దశాబ్దాలుగా పార్టీ అభ్యున్నతి కోసం శ్రమించిన నాయకులకు అధిష్ఠానం గుర్తించడం లేదని ఆయన ఆవేదన వ్యక్తంచేశారు. గతంలో రాజకీయంగా తమకు సబితారెడ్డి కుటుంబం వెన్నుదన్నుగా ఉండి ముందుకు నడిపించారని గుర్తుచేశారు. ఆ కుటుంబం నుంచి మరోసారి రాజేంద్రనగర్‌ నియోజకవర్గ ఎమ్మెల్యేగా యువనేత, బడుగుల ఆశాజ్యోతి కార్తీక్‌రెడ్డిని ఎమ్మెల్యేగా గెలిపించుకుని అణగారిన వర్గాల అభ్యున్నతి కోసం పాటుపడతామని ఆకాష్‌ ధీమా వ్యక్తంచేశారు. ఈ కార్యక్రమంలో సీనియర్‌ నేతలు సంతోష్‌ నాయుడు, రాజేష్‌లతో పాటు పలువురు కార్యకర్తలు పాల్గొన్నారు.