Yacharam | తిరుమలనాథ స్వామి ఆలయం వద్ద హెచ్చరిక బోర్డు ఏర్పాటు

అతి పురాతనమైన తిరుమలనాథ స్వామి ఆలయం వద్ద దేవాదాయ, ధర్మాదాయశాఖ హెచ్చరిక బోర్డును ఏర్పాటు చేసింది.

యాచారం, నవంబర్‌30 : రంగారెడ్డి జిల్లా యాచారం మండల కేంద్రంలోని అతి పురాతనమైన తిరుమలనాథ స్వామి ఆలయం వద్ద దేవాదాయ, ధర్మాదాయశాఖ హెచ్చరిక బోర్డును ఏర్పాటు చేసింది. యాచారంలోని అత్యంత ఎత్తైన (తిరుమలేశునిగుట్ట) గుట్టపైన శ్రీవెంకటేశ్వరస్వామి భక్తుల కొంగుబంగారంగా కొలువుదీరాడు. టీటీడీ పర్యవేక్షణలో ఉన్న ఈ ఆలయానికి సర్వే నంబర్‌ 42లో 10ఎకరాల 26గుంటల భూమి ఉన్నది. ఈ భూమిని గత కొన్నాళ్లు కొంత మంది అక్రమార్కులు కబ్జా చేసేందుకు కుట్రలు పన్నుతున్నారు. కొంత మంది ఇష్టారాజ్యంగా ఆలయ భూమిలోకి ప్రవేశిస్తున్నారు.

దీంతో రాష్ట్ర వ్యవసాయ, రైతు సంక్షేమ కమిషన్‌ చైర్మన్‌ ముదిరెడ్డి కోదండరెడ్డి ఆలయ భూమి కబ్జాపై ఆర్డీఓ అనంతరెడ్డితో, దేవాదాయ, ధర్మాదాయ శాఖ అధికారులతో చర్చించారు. ఆలయ భూమిని అక్రమార్కుల నుంచి కాపాడాలని సూచించడంతో స్పందించిన దేవాదాయ, ధర్మాదాయ శాఖ అధికారులు ఆలయ భూమిలో హెచ్చరిక బోర్డును ఏర్పాటు చేసింది. ఎవరైనా తిరుమలనాథ ఆలయానికి సంబంధించిన భూమిని కబ్జాకు పాల్పడితే చట్టపరంగా కఠిన చర్యలు తీసుకుంటామని హెచ్చరించారు.