ఆకురాలు కాలంలోనూ ఎండిన తరువుల నడుమ
పసుప్పచ్చ తంగేడై విలసిళ్లిన పరిమళం
నా తెలంగాణ..
మేడారం జాతరలో వనదేవతలావహించి
కురులిప్పి శిగమూగే తల్లి పరవశం
నా తెలంగాణ..
అసైదులా దరువుకు అలావా చుట్టూ
కూడి, ఆడి, పాడి మైమరిచే పిల్లగాండ్ల తన్మయత్వం
నా తెలంగాణ..
షడ్రుచుల మేళవింపును,
షీర్ ఖుర్మా, షర్బత్లను,పరస్పరం పంచుకునే ప్రేమతత్వం
నా తెలంగాణ..
సోపతోడు మల్లేశం,ఇఫ్తార్ విందులో ఇఫ్తికార్ పెదాలకద్దిన
ఖర్జూరపు కమ్మదనం నా తెలంగాణ..
నెమలీకల కట్టతో,
నెత్తిని నిమిరి, వీపుపై చరిచి,
రందివడ్డ మనసులకు తాయత్తు కడుతూ,
ఊరి ఆత్మకు దాదాజాన్ అంటించిన,
ధైర్యవచనం నా తెలంగాణ..
ఎవరో విడగొడితే విడిపోయేంత,
నాజూకు బంధం కాదిది..
తగవుబెడితే తగలబడేంత,
కంజోర్ దిల్ కాదు మాది..
యుగాలుగా ఈ మట్టిలోనే నాటుకొని,
తీగలుగా పారి మనసుల్ని అల్లుకొని,
మమకారాలను వెదజల్లుతున్న
నందివర్దనం పువ్వు నా తెలంగాణ..
జాబేర్ పాషా
(మస్కట్, ఒమన్)
00968 78531638