Visit:
యాత్రలు.. పాదయాత్రలు
ఓటరు దేవుళ్ల దర్శనాలకు
బహురూపుల యాత్రలు!
దేవుళ్లకు, భక్తులకు మధ్య
అనుబంధమైనది ఓటు!
దేవుడు పొగడ్తలకు పొంగిపోయి
ఐదేండ్లకోసారి అనుగ్రహిస్తాడు!
ఓటరు దేవుళ్ల ప్రాపకం పొందడానికి
భక్తుల నానావిధ యాత్రలు!
సిరికిన్‌ జెప్పడు అన్నట్లు వస్తారు
ఎండనక, వాననక లారీల్లో దేవుళ్లు!
భజన భక్తులు ఎత్తయిన గద్దెల మీద
అమాయక దేవుళ్లు నేల మీద!
కంప్యూటర్‌ యుగంలో కూడా
సభల్లో దేవుళ్ల ప్రేక్షకావతారం!
పాదయాత్రల్లో పారాయణాలు
దండకాల పురాణాలు!
మొక్కిన మొక్కులు చెల్లించకనే
పాదయాత్రలతో పవిత్రులైపోతారా!
అధికార అందలమెక్కిస్తారే గానీ
శాపాలు పెట్టలేని అమాయక దేవుళ్లు!
దేవుళ్ల బాధ తీర్చే భక్తదాసుడెవడో!
గుర్తించుట ఓటరు దేవుళ్లకే పరీక్ష!
-పి. బక్కారెడ్డి
97053 15250
