chilling video: ఎలుగుబంటి వద్దకు కుమార్తెను విసిరేసిన మహిళ.. తర్వాత ఏమైందంటే?
తాష్కెంట్: ఒక మహిళ తన మూడేండ్ల కుమార్తెను జూలోని ఎలుగుబంటి ఉన్న ఎన్‌క్లోజర్‌లోకి విసిరేసింది. ఒళ్లు జలదరింపజేసే ఈ ఘటన ఉజ్బెకిస్తాన్ రాజధాని తాష్కెంట్‌లో జరిగింది. 30 ఏండ్ల మహిళ వింతగా ప్రవర్తించింది. జూలో ఎలుగుబంటి ఉన్న చోట ఆమె నిల్చున్నది. ఉన్నట్టుండి మూడేండ్ల పాపను రైలింగ్‌ నుంచి సుమారు 16 అడుగుల దిగువన ఉన్న కందకంలోకి విసిరేసింది. అక్కడున్న మిగతా సందర్శకులు ఆమెను నిలువరించేందుకు ప్రయత్నించినప్పటికీ ఫలితం లేకపోయింది.
కాగా, ఎన్‌క్లోజర్‌లోని కందకంలో పడిన పాప వద్దకు జుజు అనే గోధుమ రంగు ఎలుగుబంటి వచ్చి వాసన చూసింది. ఇంతలో సందర్శకులు ఈ ఘటనపై జూ సిబ్బందిని అప్రమత్తం చేశారు. దీంతో వారు వెంటనే ఆ ఎలుగుబంటిని ఎన్‌క్లోజర్‌లోకి పంపి పాపను రక్షించి బయటకు తెచ్చారు. దీంతో ఆ పాపకు ఆ ఎలుగుబంటి వల్ల ముప్పు తప్పింది. అయితే 16 అడుగుల ఎత్తు నుంచి ఆమె తల్లి విసిరేయడంతో ఆ చిన్నారికి గాయాలయ్యాయి. ఈ నేపథ్యంలో ఆసుపత్రికి తరలించి చికిత్స అందిస్తున్నారు.
మరోవైపు పాపను ఎలుగుబంటి ఉన్న చోటకు విసిరేసిన తల్లిని అరెస్ట్‌ చేశారు. ఆమెపై హత్యాయత్నం కింద కేసు నమోదు చేసి దర్యాప్తు జరుపుతున్నారు. ఈ నేరం నిరూపణ అయితే 15 ఏండ్ల జైలు శిక్ష పడే అవకాశమున్నది.
కాగా, 30 ఏండ్ల ఆ మహిళ భర్త పేదరికం వల్ల పని కోసం రష్యా వెళ్లాడు. యూనివర్సిటీలో లెక్చరర్‌గా పని చేస్తున్న ఆమె తన ఇద్దరి పిల్లలు, తండ్రితో కలిసి నివసిస్తున్నది. కొంతకాలంగా డిప్రెషన్‌తో బాధపడుతున్న ఆ మహిళ ఈ విధంగా పాపను ఎలుగుబంటి ఉన్న చోటకు విసిరేసినట్లు తెలుస్తున్నది.
మరోవైపు జూలోని సీసీటీవీలో రికార్డైన ఈ వీడియో సోషల్‌ మీడియాలో వైరల్‌ అయ్యింది.
Read Today's Latest Nt-special News in Telugu and Telugu News
- Follow Us :
-
