కొండల్లో దారి తప్పిన వ్యక్తి.. ఎన్ని ఫోన్లు చేసినా ఎత్తలేదు.. కారణం ఏం చెప్పాడంటే

Lost Hiker Ignores Calls | భుజానికి ఒక బ్యాగు తగిలించుకొని కొండల్లో, కోనల్లో నడుస్తూ ప్రకృతిని ఎంజాయ్ చేయడం హైకింగ్. చాలామంది ఔత్సాహికులు

Lost Hiker Ignores Calls | భుజానికి ఒక బ్యాగు తగిలించుకొని కొండల్లో, కోనల్లో నడుస్తూ ప్రకృతిని ఎంజాయ్ చేయడం హైకింగ్. చాలామంది ఔత్సాహికులు కొండ ప్రాంతాలకు వెళ్లిన ప్రతిసారీ హైకింగ్‌కు వెళ్తుంటారు. ఒక్కోసారి ఇలా వెళ్లినప్పుడు దారి తప్పే ప్రమాదమూ ఉంది. ఇదిగో ఇలాగే ఒక వ్యక్తి దారి తప్పాడు.

విషయం తెలుసుకున్న రెస్క్యూ సిబ్బంది అతనికి వందల సార్లు ఫోన్లు చేశారు. మొబైల్ రింగ్ అవుతోంది కానీ ఎవరూ ఎత్తరు. సదరు వ్యక్తికి ఏమైందా అని ఒక బృందం వెళ్లి అడవి మొత్తం వెతికి అర్థరాత్రికి వట్టిచేతులతో వచ్చింది. ఆ మరుసటి రోజు ఉదయం తప్పిపోయిన వ్యక్తి తిరిగి తన హోటల్‌ చేరుకున్నాడు.

రాత్రంతా ఏమైపోయారని హోటల్ సిబ్బంది అడిగితే.. అడవిలో దారి తప్పి రాత్రంతా దారి వెతుక్కుంటూ ఉన్నానని చెప్పాడు. మరి రెస్క్యూ టీం ఫోన్ చేస్తే ఎందుకు ఎత్తలేదు? అని అడిగితే ‘ఆ నంబర్ నాకు తెలియదు. తెలియని నంబర్ నుంచి వస్తే ఫోన్ ఎలా ఎత్తుతాను?’ అని ఎదరు ప్రశ్నించాడు.

ఈ సమాధానం విన్న హోటల్ సిబ్బంది, రెస్క్యూ టీం నోట మాటరాలేదు. ఈ ఘటన అమెరికాలోని కొలరాడోలో జరిగింది. మౌంట్‌ ఎల్బర్ట్‌పై హైకింగ్‌కు వెళ్లిన ఒక వ్యక్తి దారి తప్పాడు. ఉదయం వెళ్లిన వాడు రాత్రికి కూడా తిరిగి రాకపోవడంతో హోటల్ సిబ్బంది కంగారు పడి సంబంధిత అధికారులకు సమాచారం ఇచ్చారు.

వారు వచ్చి అర్థరాత్రి వరకూ అడవిలో గాలింపు చర్యలు చేపట్టారు.ఎన్ని ఫోన్‌లు చేసి తప్పిపోయిన వ్యక్తి ఎత్తలేదు. ఆ మరుసటి రోజు ఉదయం హోటల్‌కు వచ్చి తెలియని నంబర్‌ నుంచి ఫోన్ వచ్చేసరికే ఎత్తలేదని సమాధానం ఇచ్చాడు.

ఈ విషయం తెలసిన అధికారులు ఎప్పుడైనా ఇలా తప్పిపోయినప్పుడు దయచేసి ఏ నంబర్ నుంచి ఫోన్ వచ్చినా ఎత్తండి అంటూ వేడుకున్నారు. ‘మన కోసం ఎవరూ వెతకరులే అనే ఆలోచన వద్దు. దయచేసి ఫోన్ వస్తే ఎత్తండి‘ అని వాళ్లు చెప్పారు.