Osmania University | వివిధ కోర్సులకు పరీక్ష ఫీజు స్వీకరణ..

ఉస్మానియా యూనివర్సిటీ, మార్చి 21 : ఉస్మానియా యూనివర్సిటీ పరిధిలోని వివిధ కోర్సుల పరీక్ష ఫీజును స్వీకరించనున్నట్లు ఓయూ కంట్రోలర్‌ ఆఫ్‌ ది ఎగ్జామినేషన్స్‌ ప్రొఫెసర్‌ నగేశ్‌ ఒక ప్రకటనలో తెలిపారు. ఉస్మానియా లాంగ్వేజ్‌ సర్టిఫికెట్‌ కోర్స్‌, ఉస్మానియా ఎంట్రెన్స్‌, ఫ్రీ డిగ్రీ కోర్స్‌, బీఏ లాంగ్వేజెస్‌, ఎంఏ లాంగ్వేజెస్‌ తదితర కోర్సుల రెగ్యులర్‌, బ్యాక్‌లాగ్‌, మేకప్‌ పరీక్షల ఫీజును వచ్చే నెల 4వ తేదీ వరకు సంబంధిత కళాశాలల్లో చెల్లించవచ్చని చెప్పారు.

రూ.200 అపరాధ రుసుముతో వచ్చే నెల 11వ తేదీ వరకు చెల్లించవచ్చని పేర్కొన్నారు. ఈ పరీక్షలను వచ్చే నెలలో నిర్వహించనున్నట్లు తెలిపారు. పరీక్ష తేదీల పూర్తి వివరాలను త్వరలోనే వెల్లడిస్తామన్నారు. ఇతర వివరాలకు ఓయూ వెబ్‌సైట్‌ www.osmania.ac.inలో చూడొచ్చని సూచించారు.