సంగీతం తెలవదు. సాహిత్యం రాదు. ‘లాంబి లాంబియే లాంబాడీ యేగేరియా’ అంటూ తల్లి పాడే పాట మాత్రం తెలుసు. తండావాసుల తండ్లాటే పల్లవిగా.. బంజారా బతుకు చిత్రాలే చరణాలుగా.. వరంగల్లు జిల్లా ఖానాపూర్ తాలుకాలో పుట్టిందొక జనం పాట.. ఆమె పేరు షాలిని. అమ్మ పేరు లక్ష్మీబాయ్. నాయిన పేరు సోమ్లా నాయక్. ‘శభాష్ సోమ్లా నాయక్ కూతురా!’అంటూ ప్రశంసలు పొందుతున్న ‘రేలారే రేలా’ షాలిని పాట ముచ్చట.
మార్ నామ్ షాలిని (నా పేరు షాలిని). హమర్ వరంగల్ జిల్లా మార్ నాజీ తండా (మాది వరంగల్ జిల్లాలోని నాజీ తండా). మార్ యడీ, బా కెతెర్ క్యామ్ కరాచ (మా అమ్మానాన్న వ్యవసాయం చేస్తరు). మా నానికి రుజ్జన్ నాతి, తాండ గ్రామెర్, గిద్ కతో మన మస్తు ఇష్టం (నాకు చిన్నప్పటి నుంచి జానపదం అంటే చాలా ఇష్టం). చాలా చిన్న తండా మాది. చదువులకు దూరంగా, పేదరికానికి దగ్గరగా ఉండేవి మా జీవితాలు. ఎన్ని బాధలున్నా సంతోషంగా ఉండేటోళ్లం. కారణం, మా జీవితంలో భాగమైన పాటలే.
అమ్మ నేర్పిన పాట
పొద్దుగాల్నే సుప్రభాతం లెక్క వినిపించే తిట్లూ, పలకరింపులకు మాకు మెలకువ వచ్చేది. తండాలో సారా కాస్తున్నరని పోలీసోళ్లు రోజూ వచ్చి లొల్లి చేస్తుండె. వాళ్లు రాంగనే అందరూ ఒక్కతాన గుమిగూడేటోళ్లు. వాకిట్ల సాన్పి చల్లుకుంటూ ‘లాంబి లాంబియే లాంబాడీ’ అంటూ అమ్మ కమ్మని పాట పాడుతుండేది. ఇసొంటి పాటలు రోజూ వినడం వల్ల మాకూ నోటికి వచ్చేవి. అందుకే, నాకు రెండో తరగతిలోనే పాటల సోపతి ఏర్పడింది. మా తండాలో ఐదో తరగతి వరకు ఉండేది. ఆ తర్వాత మంగళవారిపేట, బుధవారంపేట, నర్సంపేటలో చదివిన. ఎటు ఏడు తరాలు చూసుకున్నా కూడా మా వాళ్లకు చదువుకునే భాగ్యం లేదు. కానీ నన్ను పెద్ద చదువులు చదివించాలని అనుకున్నడు నాన్న. నాకూ చిన్నప్పటి నుంచీ చదువంటే ఇష్టం. విద్యతో పాటు సంగీతం కూడా అబ్బింది. అమ్మ నేర్పిన బంజారా పాటలు, భక్తి గీతాలు పాడేదాన్ని.
చూద్దామని పోయిన
2010 వరకు ఊళ్లోనే ఆశ వర్కర్గా పనిచేసిన. ఏఎన్ఎమ్ కోర్సు కూడా చేసిన. సెకండియర్లో ఉండగానే, ఫస్ట్ ఇయర్ స్టూడెంట్స్కు పాఠాలు చెప్పేదాన్ని. ఒకరోజు నేను హన్మకొండ నుంచి ఇంటికి వెళ్తున్న. బస్సు చాలా సేపు ఆగింది. దిగి చూసిన. పోతన ఆడిటోరియంలో కల్చరల్ ప్రోగ్రామ్ జరుగుతున్నదని తెలిసింది. చూద్దామని లోపలికి వెళ్లిన. జనాల మధ్యలో నిలబడి ఎవరో పాటలు పాడుతున్నరు. ఒక్కొక్కరు ఫోన్లో పాడుతూ అవతలి వ్యక్తికి వినిపిస్తున్నరు. నేనూ పోటీలకు వచ్చాననుకొని ఫోన్ ఇచ్చిండ్రు. ఏమీ ఆలోచించకుండా ‘సందా మామా సందామామా.. ఈ అడవి భామ మాటా విను ముద్దుల మామా’ పాట పాడిన. ‘చాలా బాగుందమ్మా.. గంటసేపట్లో వస్తాను. ఉండగలవా?’ అన్నరు ఫోన్లో మాట్లాడిన సార్.
‘సరే’ అని చెప్పిన. అది రేలారే రేలా ఆడిషన్స్ అని తెలిసింది. ఆ వ్యక్తి సురేష్ సార్. వచ్చీరాగానే ‘చివరగా పాడిన ఆ అమ్మాయి ఎక్కడ?’ అని అడిగిండు. ‘నేనే సార్’ అన్నాను. ‘లాండీ లాండీయే లాండీయే’ పాట పాడిన. అయినా, నాకు ఎక్కడో అనుమానం. ‘చూద్దామని వెళ్లిన నన్ను సెలక్ట్ చేస్తరా?’ అనిపించింది. కానీ అనూహ్యంగా రికార్డింగ్ రౌండ్లో సెలక్ట్ అయిపోయిన. ‘స్టూడియో రౌండ్లో మంచి పర్ఫార్మెన్స్ ఇస్తే ఫైనల్కు సెలక్ట్ అవుతరు’ అని చెప్పిండ్రు. 150 మందిలో 24 మంది మిగిలిండ్రు. ఇక వీడియో రౌండ్. ఫైనల్ జట్టుగా 12 మంది ఎంపికైనం. చిత్రం అనిపించింది నాకు. ఓ సంగీతం తెల్వదు. సాహిత్యం రాదు. సింగర్ను కాను. కానీ, పాట నా తలుపు తట్టింది. పేదరికంలో పుట్టి పెరిగిన కాబట్టి, వచ్చిన ప్రతీ అవకాశాన్ని కెరీర్కు అనుగుణంగా మలుచుకునేదాన్ని.
జానపదానికి పాశ్చాత్యం తెలంగాణ ఉద్యమంలోనూ నా పాట వినిపించిన. ‘ఆడుదాం డప్పుల్లా దరువెయ్రా తల్లీ తెలంగాణ పాట పాడరా’ వంటి ఉద్యమ గీతాలను బంజారాలోకి అనువదించి కొత్త పంథాను ఎంచుకున్న. సునీలన్న, వరంగల్ శ్రీనన్న సహకారంతో, రసమయి బాలకిషనన్న ప్రోత్సాహంతో తెలంగాణ సాంస్కృతిక సారథి (టీఎస్ఎస్)లో ఉద్యోగంలో చేరిన. 2016లో యూట్యూబ్లో తొలిసారిగా ‘చినుకు చినుకు’ పాటతో కొత్త జర్నీ మొదలుపెట్టిన. తెలంగాణ జానపదానికి వెస్ట్రన్ జోడిస్తూ.. భరత్ మేకల సహకారంతో ‘వంక వంకా జీడివంక’ పాట తీసుకొచ్చిన. ‘జానపదానికి పాశ్చాత్యమా?’ అంటూ అప్పుడు అభ్యంతరం తెలిపినవాళ్లు కూడా, తర్వాత నా దారిలోనే నడిచిండ్రు. జానపద, బంజారా వైభవాన్ని సినిమా మాధ్యమం ద్వారా వినిపించాలన్నది నా ఆశయం.
నిర్భయకు అంకితం
ఫస్ట్ ఎపిసోడ్లో.. నన్ను ఇక్కడిదాకా తీసుకొచ్చిన ట్రైబల్ సాంగ్ ‘లాండీ లాండీయే’నే రేలారేలో పాడిన. టీవీలు మార్మోగినయి. అమ్మ సంబురం మాటల్లో చెప్పలేనిది. అసలు మా తండా మొత్తంలో ఒకరింట్లో మాత్రమే టీవీ ఉండేది. ‘టీవీ లేని స్థితి నుంచి టీవీలో వచ్చేదాక వెళ్లింది నా బిడ్డ’ అని మురిసిపోయేది అమ్మ. ‘నా బిడ్డకు కష్టం రావద్దు’ అని మా నాయిన మక్కలు అమ్మి టీవీ కొన్నడు. ఇక, రేలారే విషయానికి వస్తే .. ఫైనల్స్లో ‘సన్నా సన్నపు రవికె.. సన్నపు రవికె సన్నాపు రవికె’ పాటతో విజేతగా నిలవడంతో దేశ విదేశాలకు నా పాట చేరింది. ఈ పాటను
‘నిర్భయ’కు అంకితమిచ్చిన.