105 నిమిషాల్లో ఏం జరిగింది?

హన్సిక కథానాయికగా సింగిల్‌ క్యారెక్టర్‌తో ప్రయోగాత్మకంగా రూపొందుతున్న చిత్రం ‘105 మినిట్స్‌’. రాజు దుస్సా దర్శకుడు. బొమ్మక్‌ శివ నిర్మిస్తున్నారు. చిత్రీకరణ పూర్తయింది. ఈ చిత్ర వీడియో గ్లింప్స్‌ను సినిమాటోగ్రాఫర్‌ కె.కె. సెంథిల్‌కుమార్‌ విడుదలచేశారు. ఈ సందర్భంగా ఆయన మాట్లాడుతూ ‘హాలీవుడ్‌లో మాత్రమే ప్రయత్నించిన సింగిల్‌షాట్‌ విధానంలో తెలుగు వాళ్లు కూడా సినిమాలు చేయగలరని దర్శకుడు రాజు ఈ చిత్రం ద్వారా నిరూపించారు. కథ, కథనాలు థ్రిల్లింగ్‌గా ఉన్నాయి. కొత్త ఆలోచనలతో తెలుగులో ఇలాంటి సినిమాలు రూపొందుతుండటం గర్వంగా ఉంది’ అని తెలిపారు. ‘సింగిల్‌ షాట్‌ విధానంలో సింగిల్‌ క్యారెక్టర్‌తో ఈ సినిమా చేస్తున్నాం. ఓ ఇంటిలో బందీగా మారిన యువతి కథ ఇది. ప్రస్తుతం నిర్మాణానంతర కార్యక్రమాలు జరుపుతున్నాం’ అని నిర్మాత తెలిపారు. ఈ చిత్రానికి సంగీతం: సామ్‌ సీఎస్‌, ఛాయాగ్రహణం: కిషోర్‌ బోయిడపు.