హైదరాబాద్, మార్చి 9 (నమస్తే తెలంగాణ): #కేసీఆర్ #తెలంగాణ.. సోషల్ మీడియాలో హోరెత్తిన హ్యాష్ట్యాగ్లు ఇవి. ఉద్యోగాల భర్తీపై బుధవారం ముఖ్యమంత్రి కే చంద్రశేఖర్రావు అసెంబ్లీలో ప్రకటన చేయగానే, ఆ పోస్టులు వైరల్ అయ్యాయి. ముఖ్యంగా ఈ రెండు హ్యాష్ట్యాగ్లు ట్రెండింగ్లో నిలిచాయి. అన్ని సామాజిక మాధ్యమాల్లో ఉద్యోగాల భర్తీ ప్రకటన, వివరాలు, అభినందనలు, సంబురాలు హోరెత్తాయి. తెలంగాణ హ్యాష్ట్యాగ్ సాయంత్రం వరకు అగ్రభాగాన నిలిచింది. ట్విట్టర్లో దాదాపుగా 6 వేల ట్వీట్లకు తెలంగాణ హ్యాష్ట్యాగ్ పెట్టారు. సామాజిక మాధ్యమాల్లో ఉద్యోగాల భర్తీకి సంబంధించిన వివరాలు, సీఎం కేసీఆర్ బొమ్మతో కూడిన ఫొటోలను పోస్ట్ చేశారు. ట్విట్టర్, ఫేస్బుక్, ఇన్స్టాగ్రామ్లో అత్యధికులు కేసీఆర్కు ధన్యవాదాలు తెలుపుతూ పోస్టులు పెట్టారు. అదే సమయంలో బీజేపీ ఎన్నికల మ్యానిఫెస్టోలో చెప్పిన ఏటా 2 కోట్ల ఉద్యోగాలు ఏవని, ఇప్పుడు బత్తాయిలు ఏం చేస్తారని.. విమర్శిస్తూ, వ్యంగ్యంగా పోస్టులు చేశారు. సీఎం కేసీఆర్కు చేసిన క్షీరాభిషేకాలు, సంబురాల ఫొటోలను పెద్దఎత్తున పోస్ట్ చేశారు. మరికొందరు ఉద్యోగాల అర్హతలు, నిబంధనలు పోస్ట్ చేశారు. నిరుద్యోగ యువకులు ఇక ఉద్యోగాలకు ప్రిపేర్ కావాలని, ఇదే మంచి అవకాశం అని పేర్కొన్నారు.