దూరాలను కలిపే దారాలు

ఉదయమే మాట్లాడుకున్నా సాయంత్రానికంతా బోలెడంత విరహ వేదన. పక్కపక్కనే కూర్చుని ఎన్ని ఊసులు చెప్పుకొన్నా , ఓ రెండు గంటలు అవతలి ఫోన్‌ నుంచి మెసేజ్‌ రాకపోతే ఎంతో వెలితిగా ఉంటుంది. ఇక ఇద్దరూ వేరువేరు నగరాల్లో, వేరువేరు దేశాల్లో

ఉదయమే మాట్లాడుకున్నా సాయంత్రానికంతా బోలెడంత విరహ వేదన. పక్కపక్కనే కూర్చుని ఎన్ని ఊసులు చెప్పుకొన్నా , ఓ రెండు గంటలు అవతలి ఫోన్‌ నుంచి మెసేజ్‌ రాకపోతే ఎంతో వెలితిగా ఉంటుంది. ఇక ఇద్దరూ వేరువేరు నగరాల్లో, వేరువేరు దేశాల్లో, వేరువేరు ఖండాల్లో ఉంటే.. ఆ ఎడబాటును మాటల్లో చెప్పలేం. మానసికంగా ఆ దూరాన్ని పోగొట్టడానికి అనేక మార్గాలు..

గిఫ్ట్‌ బాస్కెట్‌
ప్రియమైనవారి కోసం నచ్చిన వస్తువులతో గిఫ్ట్‌ బాస్కెట్‌ తయారు చేయండి. అన్నీ ఖరీదైనవే కానక్కర్లేదు. మీరు ఎంతగా ప్రేమిస్తున్నారో తెలియజేసేలా ఉంటే చాలు. ఇలా చేస్తే, ఎంత దూరాన ఉన్నా మిమ్మల్ని చూసినట్టే ఫీలవుతారు.

ప్రేమలేఖ
ఇప్పుడన్నీ మెసేజ్‌లే. ఎంత ప్రేమగా మాట్లాడినా, ఎన్ని ఊసులు చెప్పుకొన్నా.. అవన్నీ మరుసటి రోజుకు మరుగునపడిపోతాయి. కానీ ఇష్టమైన వారికి ప్రేమలేఖను పంపారనుకోండి. కలకాలం దాచుకుంటారు. మళ్లీ మళ్లీ చూసుకుంటారు. ఇష్టంగా చదువుకుంటారు. మీ భావాలన్నీ అందులో ఉంటాయి.

నచ్చిన రుచులు
ప్రేమించిన వాళ్లు కడుపునిండా తింటే ఇవతలి వాళ్లకూ ఆనందమే. అందుకే, వారికి ఇష్టమైన ఆహారాన్ని ఆర్డర్‌ చేయండి. తను ఆకలితో ఇంటికి వెళ్లే సమయానికి వేడివేడి భోజనం సిద్ధంగా ఉండేలా ప్లాన్‌ చేయండి.

ఆన్‌లైన్‌ డేట్‌
ఓ వారాంతపు సాయంకాలం దూరంగా ఉన్నాసరే ఇద్దరూ పక్కపక్కనే ఉన్న అనుభూతి కలిగేలా ఆన్‌లైన్‌ డేట్‌నైట్‌ ప్లాన్‌ చేయండి. కొవ్వొత్తుల వెలుగుల మధ్య అందమైన దుస్తుల్లో ముస్తాబై అవతలి వాళ్లకు వీడియోకాల్‌ చేయండి. ఇద్దరూ ఒకేసారి ఆన్‌లైన్‌లో సినిమా చూడండి. కబుర్లు చెప్పుకొంటూ కాలం గడపండి. దీంతో ఒకరికొకరు దగ్గరగా ఉన్న భావన కలుగుతుంది.

ఆశ్చర్యపరచండి
మీరు ప్రేమించే వ్యక్తి సర్‌ప్రైజ్‌ను ఇష్టపడే వారైతే చెప్పాపెట్టకుండా వెళ్లి ఆశ్చర్యపరచండి. ప్రియమైన వారిని కలవడం ఎంతో ఆనందాన్ని ఇస్తుంది.అలా ఒక వారాంతాన్ని మధురాను భూతిగా తీర్చి దిద్దుకోండి.