వడోదర: బరోడా క్రికెటర్ విష్ణు సోలంకి మరోమారు తీరని శోకంలో మునిగిపోయాడు. పదిరోజుల క్రితం అప్పుడే పుట్టిన కూతురిని కోల్పోయిన సోలంకి.. తనను పెంచి పెద్ద చేసిన తండ్రి ఆదివారం కన్నుమూశాడు. రంజీ ట్రోఫీ కోసం ప్రస్తుతం కటక్లో ఉన్న సోలంకి… తండ్రి ఆఖరి చూపులకు నోచుకోలేకపోయాడు. వీడియోకాల్ ద్వారా తండ్రి అంత్యక్రియలను చూడటం అందరినీ కలిచివేసింది. కొన్ని రోజుల వ్యవధిలో కూతురుతో పాటు తండ్రిని కోల్పోయిన సోలంకి గురువారం నుంచి హైదరాబాద్తో మొదలయ్యే కీలకమైన మ్యాచ్కు సిద్ధమవుతున్నాడు. ఇద్దరు ఆప్తులను దూరం చేసుకుని కడు దుఃఖంలో ఉన్న సోలంకి తన బాధనంతా దిగమింగుకుంటూ ముందుకు సాగుతున్నాడు. ఇదిలా ఉంటే గతనెల 10న జన్మించిన విష్ణు కూతురు ఒక రోజు తేడాతో కన్నుమూసింది. చిన్నారి అంత్యక్రియలకు హాజరై తిరిగి వచ్చిన సోలంకి..చండీగఢ్తో జరిగిన మ్యాచ్లో సెంచరీ(104)తో అదరగొట్టాడు. క్లిష్ట సమయంలో చేసిన శతకాన్ని తన కూతురుకు అంకితమిస్తున్నట్లు ప్రకటించాడు. చిన్నారి మరణం నుంచి తేరుకుంటున్న సమయంలోనే తండ్రి మరణవార్త.. సోలంకిని మరింత కుంగదీసింది.