చెరువుల లీజుకు పాత ధరలే

• ఉత్తర్వులు జారీచేసిన ప్రభుత్వం
• మత్స్యకారులకు ఉగాది కానుక
• మంత్రి తలసాని శ్రీనివాస్‌

హైదరాబాద్‌, మార్చి 30 (నమస్తే తెలంగాణ): చెరువుల లీజుకు పాత ధరలనే కొనసాగిస్తూ రాష్ట్ర ప్రభుత్వం బుధవారం ఉత్తర్వులు జారీచేసింది. పంచాయతీరాజ్‌శాఖ పరిధిలోని చెరువుల్లో చేపల పెంపకం, చేపల వేటపై యాజమాన్య హక్కులను జీవో 268 ద్వారా మత్స్యశాఖకు బదిలీ చేసింది. గతంలో శాశ్వత నీటి సౌకర్యం గల చెరువులకు హెక్టారుకు రూ.400, ఎక్కువ కాలం నిల్వ ఉంటే రూ.400, తక్కువ కాలం నీరు నిల్వ ఉంటే రూ.60 చొప్పున లీజు నిర్ణయించారు. ఇప్పుడు కూడా అదే లీజు కొనసాగించాలని ఆదేశించారు. ఈ నిర్ణయం ద్వారా 4,793 మత్స్య సొసైటీల్లోని 3.54 లక్షల మంది మత్స్యకారులకు లబ్ధి చేకూరనున్నది. పాత లీజు కొనసాగింపు నిర్ణయంపై మత్స్యశాఖ మంత్రి తలసాని శ్రీనివాస్‌యాదవ్‌ హర్షం ప్రకటించారు. మత్స్యకారులకు సీఎం కేసీఆర్‌ ఉగాది కానుకను ఇలా ముందే అందజేశారని పేర్కొన్నారు.